Vreugde in Montevideo gee WB-hupstoot

Andrew Poolman - Cliven Loubser se koelkop strafdoel ná ses minute beseringstyd wat Namibië se geskiedkundige eerste oorwinning teen Uruguay verseël het, was Sondagaand ’n broodnodige inspuiting van selfvertroue in Namibië se aanloop tot die Wêreldbekertoernooi in September.Die Namibiese span het Uruguay in sy hoofstad Montevideo met 30-28 geklop om die verdedigende kampioen van die Wêreldrugby Nasiebekertoernooi ’n knou toe te dien.Die oorwinning in ’n wegwedstryd teen ’n land wat vooraf agt plekke hoër op die wêreldranglys was, het Namibië sommer dadelik met twee plekke van 23ste tot 21ste laat opskiet toe die weeklikse ranglys gisteroggend op datum gebring is.Hierdie sukses sonder bykans ’n halwe span wat óf beseer óf nie deur hul Europese klubs vir die toer vrygestel is nie, is ongetwyfeld ’n tydige hupstoot vir Namibië in die aanloop tot die Wêreldbeker, waar hy teen Italië, Suid-Afrika, Nieu-Seeland en Kanada gegroepeer is.“Ek is baie trots op die spelers se vertoning. Ons het sover goeie rugby gespeel en hierdie oorwinning is ’n beloning vir die spelers se moeite,” sê afrigter Phil Davies.“Om ’n land agt plekke hoër op die wêreldranglys op sy tuiswerf te klop, gee ons groot bevrediging. Die spelers en bystandspersoneel werk geweldig hard en ek hoop dat Namibië genoegsaam trots op hulle is. Ons beweeg in die regte rigting,” het die Wallieser bygevoeg.Die president van die Namibië Rugby-unie, mnr. Corrie Mensah, het die wedstryd as toeskouer bygewoon en was gister ewe in sy noppies.“Ons is nog steeds besig om hierdie groot oomblik te absorbeer. Ons dink noodwendig terug aan ons vorige wedstryd teen Argentinië as ’n grote wat weggekom het.“Die manne se lywe is seer, maar alles was die moeite werd. Ons sal dit vir die volgende dag of twee stadig vat en dan alles gee teen Rusland (komende Saterdag). Ons sal graag goed wil afsluit en ons ranglysposisie verder verbeter. Baie trots op die manne!”Rusland, onder afrigterskap van Lyn Jones wat tot verlede jaar Namibië se Windhoek Draught Welwitschias in die provinsiale kompetisie afgerig het, het ’n oorwinning met 48-40 teen die Argentynse XV behaal. Jones se tweestryd met sy mede-Wallieser en voormalige nasionale spanmaat sal gewis iets ysliks afgee. In November verlede jaar het Jones se Russe in Krasnodar met 47-20 die oorhand gekry, met Davies wat om persoonlike redes die reis misgeloop het.Davies sê: “Rusland is vir ons ’n interessante wedstryd. Al die fokus sal daarop gerig wees om die vertoning teen Uruguay ewe goed op te volg en om ons spel verder te verbeter.“In die laaste twee wedstryde was die bal vir tussen 39 en 40 minute lewendig. Die spelers se werktempo verbeter deurlopend.”Met een ronde oor, het drie spanne nog ’n kans om die toernooi te wen. Die twee voorlopers Uruguay (sewe punte) en Argentinië (6) speel Saterdag teen mekaar, terwyl Rusland (6) ook nog ’n wenkans het wanneer hy teen Namibië (4) te staan kom.OPENBARINGDie kliniese rugby waarmee kaptein Johan Deysel en sy manne vir Uruguay in die eerste helfte in ’n wurggreep gekry en hulle geen beweegruimte gegun het nie, was ’n openbaring.Die Suid-Amerikaners se vermoëns was goed bekend nadat hulle in November 2017 twee toetse in Windhoek met 52-36 en 39-34 beklink het.Uruguay het egter dikwels vir etlike fases aangeval sonder om ’n tree veld te wen, ongeag of hy sy stampkarre in die middelveld of sy snellers in die wyer kanale probeer gebruik het.Hierdie soort toewyding om op aanval of verdediging vir elke tree te veg, was die grondslag waarop die Namibiese oorwinning gebou was – tesame met elke speler se uitstaande uitvoering van sy individuele taak.Nadat Cliven Loubser die telbord met sy eerste strafdoel ná tien minute geopen het, het Namibië se yster-agtsteman Janco Venter met twee indrukwekkende drieë (beide verdoel deur Loubser) die telling tot 17-0 ná 24 minute help opjaag.Eers het Venter van agter ’n vyfmeterskrum regs om gebreek en het reeds onkeerbare momentum gehad voordat hy deur die verdedigers oorgebars het. Vir sy tweede drie is aanvallende besit in die middelveld verkry en het sy flank Wian Conradie vir Venter in spasie teen die linkerkantlyn af gestuur, waar die laaste man in sy pad ook min kans gestaan het om te keer dat hy in die hoekie gaan druk.Die ontwakende gejuig van die Montevideo-skare toe Uruguay ná 35 minute ’n strafskop kry om uit hul eie helfte te ontsnap, het gespreek van Namibië se totale oorheersing tot in daardie stadium. Bykans onmiddellik daarna het Uruguay egter gereageer met ’n agterlyn-breekslag vir ’n puik drie deur die vleuel Andres Vilaseca, wat verdoel is om die gaping met rustyd tot 17-7 te laat krimp.Ná rustyd was Namibië wéér die eerste puntemakers met ’n Loubser-strafdoel, maar Uruguay het nog ’n puik drie vir Vilaseca geskep met ’n akkurate rollende dwarsskoppie wat presies reg vir die vleuel op vaart gewip het om die opposisie geen kans te laat nie.Namibië se volgehoue druk het egter weer vrugte afgewerp toe die tuisspan ’n benoude aangee in sy eie doelgebied laat val het waarop vleuel JC Greyling kon toeslaan vir sy 20ste drie in 31 toetse.Oderich Mouton het ’n stewige vertoning op vleuel bederf deur ’n geel kaart ná 55 minute op die lyf te loop vir sy inmenging met ’n Uruguaan wat in die lug gespring het om ’n skop te vang. Dit het tot die swaai in momentum bygedra.In die tweede helfte het Uruguay groter sukses behaal deur sy dryfspel baie konserwatief naby aan die kontakpunt te hou, wat die grondslag vir sy volgende twee drieë deur die reserwe-agterspeler Manual Ardao en haker German Kessler gelê het.Kessler se drie was in die regterhoekie en toe Federico Favaro se doelskop sekuur deur die pale seil, was speeltyd verby met Uruguay een punt voor (28-27).Namibië is egter toegelaat om die afskop waar te neem en Uruguay het selfs ’n strafskop gekry en kantlyn toe gestuur, maar Tjiuee Uanivi se teensprong het die kosbare balbesit verseker waarmee Namibië vir die volgende vyf minute konstant vorentoe gedryf en twee strafskoppe afgedwing het voordat hulle die beslissende kans binne trefafstand gekry het.’n Hoogvat op die reserweflank Thomasau Forbes, wat in Wian Conradie se plek opgestuur was, het die strafskop gebring wat Loubser op sy kalm manier van buite die tienmeterlyn deur die regoppale gejaag het. Die eindfluitjie het wilde bokspringe en ’n gejuig in die Namibiese geledere ontketen wat onmiskenbaar gespreek het van hoeveel hierdie deurbraak vir die nasionale span beteken – nadat Los Teros oomblikke tevore so byna weer hul harte gebreek het.

Vreugde in Montevideo gee WB-hupstoot

Kommentaar

Republikein 2025-09-19

Meld asseblief aan om kommentaar te lewer

Vreugde in Montevideo gee WB-hupstoot

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie