Vragverkeer via Botswana staan weens toe grenspos

Ronelle Rademeyer - Suid-Afrika het die Skilpadshek-grenspos tussen dié land en Botswana tydelike gesluit nadat ’n reisiger wat op 16 Mei deur die grenspos beweeg het, positief getoets het vir Covid-19.
Die grenspos is gesluit om die verdere verspreiding van die virussiekte te voorkom.
Mnr. MC Moagi van die department van gesondheid in Suid-Afrika het gister in ’n brief aan die grenspos se bestuurskomitee opdrag gegee om die “operasionele gedeelte” te ontsmet. Hy het gesê die gesondheidsbeampte by die grenspos sal die hoërisiko-gebiede uitwys. Dit sluit die toilette in.
Almal wat met die besmette persoon in kontak was, word opgespoor en geïsoleer, sê hy in die brief.
Vragmotors wat vrag uit Gauteng en ander dele van Suid-Afrika via Botswana na Namibië vervoer, gebruik hierdie grenspos by Zeerust.
Botswana het Saterdag begin om alle vragmotorbestuurders en ander reisigers wat die grenspos gebruik, vir Covid-19 te toets. ‘n Reël is ook ingestel dat vragmotors voortaan onder polisiebegeleiding in ‘n konvooi deur Botswana moet beweeg.
Moagi het vanoggend (Woensdag) by navraag aan Republikein gesê sodra die nodige ontsmetting gedoen is om seker te maak die virus is nie meer by die grenspos aanwesig nie, sal dit oopgestel word. Hy kon nie sê hoe lank dit sal duur nie.
Volgens hom is vragmotorbestuurders aangeraai om alternatiewe roetes na hul bestemmings te gebruik.

Foto Wikipedia