Volhoubare ontwikkeling beloon

Ogone Tlhage - Dr. Michael Humavindu, lid van die raadgewende raad vir volhoubare ontwikkeling, het die tweede weergawe van toekennings vir volhoubare ontwikkeling amptelik bekend gestel.
Die seremonie sal na verwagting in September plaasvind. Volgens Humavindu is dié toekennings 'n belangrike projek van die raad.
“Ek is verheug dat die Hanns Seidel-stigting en die Klimaatveranderingsprojek die raad en die omgewings­beleggingsfonds vanjaar met die reëlings vir die geleentheid bystaan. Hulle is ook medeborge,” het Humavindu gesê.
Hy het tydens die bekendstelling van vanjaar se toekennings die name van nuwe borge vir die geleentheid aangekondig.
“Dit is vir my 'n vreugde om bekend te maak dat 'n aantal ander vennote hulself ook daartoe verbind het om die toekennings te ondersteun. Dankie aan Nedbank, Namibia Media Holdings, Agribank, die Nasionale Raad vir Navorsing, Wetenskap en Tegnologie (NCRST), die Namibiese Instituut vir Sake-innovering, asook die Finse ambassade vir hul toewyding en ondersteuning.”
Volgens Humavindu sal die toekennings help om bewustheid oor volhoubaarheid te skep.
“Die hoofdoelwit van die toekennings vir volhoubare ontwikkeling is om bewustheid van die belangrikheid daarvan onder alle Namibiërs te skep en ook om die uitstaande bydraes en individue wat in dié veld werk, te beloon en te erken,” het Humavindu gesê.
Hy het gesê volhoubaarheid is 'n belangrike element in die beplanningsproses.
“Volhoubare ontwikkeling is die hoeksteen van ons nasionale beplanningsdokumente wat ook die breë fokus daarvan uitlig in terme van hoe ons ons ekonomie, gemeenskap en omgewing bestuur sodat daar aan die behoeftes van die toekoms voorsien word,” het Humavindu verduidelik.
Vanjaar se kategorieë sluit lede van die private sektor in wat volhoubare ontwikkeling voorstaan. Daar is ook subkategorieë vir die stigting van ondernemings, klein en medium sakeondernemings, sowel as gevestigde maatskappye, gemeenskapsgebaseerde natuurlike hulpbronnebestuur en benuttingsprojekte, asook navorsing en ontwikkeling.
Die toekennings sal ook individue se prestasies vier.
“Erkenning sal gegee word aan individue wat groot bydraes lewer as ambassadeurs vir volhoubare ontwikkeling in Namibië, pioniers op die gebied van joernalistiek met die klem op volhoubare ontwikkeling wat sal fokus op erkenning in die gedrukte media, sosiale media, radio, televisie, asook die betrokkenheid van die jeug by volhoubare ontwikkeling.”
Humavindu het gesê dit is noodsaaklik om pogings te vier wat volhoubaarheid ondersteun en bevorder.
“Ons weet daar is baie individue en organisasies wat 'n verskil op die gebied van volhoubare ontwikkeling maak en die land help om sy volhoubare ontwikkelingsdoelwitte te bereik.”
Die sluitingsdatum vir aansoeke is 14 Augustus. Verdere inligting oor die proses en prosedures is beskikbaar by die sekretariaat van die raad, die Omgewingsbeleggingsfonds en die Hanns Seidel-stigting. Die amptelike toekenningsaand sal op 21 September plaasvind. Die raadgewende raad vir volhoubare ontwikkeling bedien die regering van raad wat ontwikkelingsake betref en bevorder die samewerking en koördinasie van aangeleenthede wat met volhoubaarheid verband hou.
Die eerste toekenningseremonie het in Mei 2015 plaasgevind en is deur die raad, in vennootskap met die ministerie vir die omgewing en toerisme en die Omgewingsbeleggingsfonds van Namibië, aangebied.