VN vra vir menseregtemonitors in Soedan

Die Soedannese militêre raad wat die land ná ’n burgerlike opstand oorgeneem het en nou die burgerlike betogings met geweld onderdruk, moet menseregtemonitors toelaat, die internetverbinding herstel en die onderdrukking staak.So sê Michelle Bachelet, die Verenigde Nasies (VN) se hoëkommissaris vir menseregte, nadat haar kantoor onder meer verslae ontvang het waarvolgens meer as 100 betogers op 3 Junie dood is. Nog baie meer is ook beseer toe die veiligheidsmagte op die vreedsame sitbetoging toegeslaan het.“Ons het gehoor van beweerde verkragtings en die seksuele aanranding van mans en vroue tydens hierdie aanvalle op die betogers. Daar word ook gesê honderde van die betogers word vermis,” het sy Maandag op die 41ste sitting van die VN se Menseregteraad gesê.Die betogers het Maandag weer op die oordrag van gesag aan ’n burgerlike regering aangedring. Dit was ná die opstand van die burgerlikes teen die voormalige leier, Omar al-Basjir, dat die weermag by hulle aangesluit het. Daarna het die militêre magte die regering oorgeneem. Die opstand was ook teen die weermag gerig en daar is nou mense in die regeringsraad teen wie die betogers spesifiek aanvanklik betoog het.DREUNSINGDie betogers het Maandag “Burgerlik! Burgerlik!” gedreunsing toe daar met knuppels onder hulle ingevlieg is. Onderhandelinge tussen die burgerlikes en die militêre raad is intussen gestaak.Die organisasie Human Rights Watch (HRW) het ’n beroep op die militêre raad gedoen om die geweld teen die betogers, veral op 3 Junie, te ondersoek.“Daar het verskriklike beeldmateriaal bekend geword van tente wat brand met mense binne-in, traangas wat gegooi word en skote wat geskiet word,” sê Laila Matar van HRW.Die weermag sê ’n aanslag op misdadigers naby die betogers het na hulle toe oorgespoel en weermagpersoneel word daaroor aangehou. Die raad sê hulle is steeds van plan om die mag aan burgerlikes te oorhandig.Die Soedannese Professionele Vereniging, die grootste burgerlike protesgroep in Soedan, het Maandag op ’n nuuskonferensie gesê die militêre raad is “stelselmatig besig om die vooruitgang van die revolusie te ondermyn deur die vernietiging van vryheid van spraak en deur betogers gewelddadig te pak”.Die Vereniging sê hulle gaan voort met betogings en beplan ’n groot protesoptog op 30 Junie.Abij Ahmed, premier van Ethiopië, asook die Afrika-unie (AU), probeer die situasie bemiddel. Die militêre raad het Saterdag Ahmed se plan verwerp – wat deur die burgerlike koalisie aanvaar is – maar wel in beginsel met die AU se voorstel saamgestem. – Netwerk24/Reuters

VN vra vir menseregtemonitors in Soedan

Kommentaar

Republikein 2025-06-18

Meld asseblief aan om kommentaar te lewer

VN vra vir menseregtemonitors in Soedan

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie