Vloedwaarskuwing vir riviere

Francoise Steynberg – Die Hidrologiese Dienste van Namibië waarsku in hul vloedbulletin teen vloede in die streke Omusati, Oshana, Ohangwena, Kunene, Khomas, Omaheke en ||Kharas.“Gemeenskappe in die vloedgeteisterde gebiede moet die nodige voorsorgmaatreëls tref,” lui die bulletin wat Woensdag uitgereik is. “Ons voorspellings vir die huidige reënseisoen vir ’n normale tot bo-normale reënseisoen is korrek. Ongewone swaar reën het in die begin van Januarie in die noordelike, sentrale, noordoostelike, oostelike en suidelike dele van Namibië voorgekom en duur steeds voort. Dit het gelei tot swaar vloede in rivieropvangsgebiede." Volgens die bulletin dui satellietbeelde op swaar reën oor die noordelik-sentrale, noordoostelike en suidelike dele van die land. “Riviere in die suidelike en sentrale dele het in vloed in bruisende strome water afgekom wat skade aan eiendomme, paaie en landbou-infrastruktuur aangerig het.”Volgens die bulletin het droë rivere in die binneland, soos die Visrivier, groot en herhaalde vloede beleef. Weens swaar reënval en hoë aflope in hul opvangsgebiede het vloede ook in die Khan-, Kuiseb-, Swakop-, Omatako-, Ondekaremba-, Grass- en Rietkuilrivier voorgekom.Riviere in Windhoek was ook in vloed weens erge donderstorms en skade is aan huise en infrastruktuur aangerig.CUVELAI“Die watervlakke van die oostelike Cuvelai iishanas het stadig sedert 6 Januarie begin styg. Vloei is weens swaar reën in die Cuvelai-Etosha-opvangsgebied by sommige Cuvelai iishanas aangemeld, maar nie weens die hoof-efundja wat vanaf Angola kom nie,” lui die bulletin. Vloei in die riviere Kunene, Okavango en Zambezi is ook geleidelik aan die styg. Die Zambezirivier by Katima Mulilo het gister op 1,79 m gestaan, terwyl dit verlede week op ’n vlak van 1,06 m was. Verlede jaar die ooreenstemmende tyd was die Zambezirivier se vlak op 0,79 m. Die Kavangorivier se vlak by Rundu was gister op 4,35 m, terwyl dit verlede week op 4,32 m gestaan het. Verlede jaar die ooreenstemmende tyd was die riviervlak hoër op 4,7 m. Volgens die bulletin word verwag dat vlakke in die laer-Oranjerivier ook sal styg weens die bykomende vrylatings van damme stroomop in Suid-Afrika, asook bykomende vloei van die Visrivier weens die reën en die vrylating van water uit die Nautedam in die Oranjerivier se opvangsgebied.Die Oranjerivier se vlak by Blouputs was gister 1,09 m teenoor verlede week se 1,48 m en by Sendelingsdrift was die rivier se vlak gister 0,99 m. “Gemeenskappe moet waaksaam wees vir moontlike vloede en die nodige voorsorgmaatreëls tref,” maan die hidrologiese dienste in die ministerie van landbou, water en grondhervorming. – francoise@republikein.com.na.

Vloedwaarskuwing vir riviere

Kommentaar

Republikein 2025-12-22

Meld asseblief aan om kommentaar te lewer

Vloedwaarskuwing vir riviere

Kommentaar

Republikein 2025-12-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.