A330’s na Malta: Vlieëniers se lisensies verval

Ronelle Rademeyer – Terwyl dit duidelik is die regering gaan nie ’n ommekaar maak op die kabinet se besluit om Air Namibia te likwideer nie, sê ingeligtes dit gaan “baie kos en moeilik wees” om die Airbus A330-200’s aan Air Lease 82 in Ierland terug te besorg.Dit blyk die lisensies van al Air Namibia se Airbus A330-vlieëniers het verstryk sedert die Frankfurt-vlugte in Maart verlede jaar gestaak is toe Namibië sy grense weens Covid-19 moes sluit.“Dit is nie net die A330-vlieëniers wie se lisensies verval het nie; die vlieëniers van die vier Airbus A319-100’s se lisensies moet ook hernu word,” het mnr. Heino Jakob, president van die Namibië Rederyvlieëniersvereniging (Napa), gister bevestig.Twee van die Airbus A319’s word net soos die A330’s gehuur en moet binnekort aan die eienaar terugbesorg wordDie Airbus-vloot, met die uitsondering van een van die A319’s wat onderhoudswerk by SAA Technical in Suid-Afrika ondergaan, staan sedert vlugte gestaak is langs die aanloopbaan by die Hosea Kutako Internasionale Lughawe geparkeer.“Ons gaan gereeld en skakel die enjins aan. Maar ’n vliegtuig wat nie diens doen nie, verniel. Dit is soos ’n kar wat nie gery word nie,” sê Jakob.Vir die vlieëniers om hul lisensie hernu te kry, moet hulle weer opleiding by ’n geakkrediteerde opleidingsinstelling ondergaan.“Ons kyk na ten minste vier ure in die nabootser teen 400 euro (N$7 116) per uur. Dit is 1 600 euro per vlieënier.“Om die vliegtuie in Europa te gaan aflewer, sal ’n bemanning van ses per vliegtuig gestuur word. Dit is dus twaalf vlieëniers wat teen 1 600 euro (N$28 464) opleiding moet ontvang voor hul lisensies hernu kan word. Dit sluit nie die reis- en verblyfkoste in nie,” het ’n vlieënier, wat anoniem wil bly, aan Republikein gesê.Volgens hom skuld Air Namibia vir Lufthansa geld en sal hulle nie toegelaat word om die opleiding in Frankfurt te ondergaan voordat die skuld nie vereffen is nie. “Dieselfde geld SAA Technical in Suid-Afrika. Ons het nou die dag vergader en dit lyk asof ons dit in Kaïro in Egipte kan gaan doen,” sê hy.Dit blyk verder uit inligting wat aan Republikein verskaf is dat “dit baie gaan kos” om die Airbus A330’s weer in ’n goeie toestand te kry.“Die vermaakstelsel op albei die vliegtuie werk geruime tyd nie meer nie,” sê een van die bronne. Die kontrak met die Amerikaanse vliegtuigverhuringsmaatskappy, Castlelake Aviation, bepaal die vliegtuie moet aan die eienaar, Air Lease 82, teruggegee word in dieselfde toestand waarin dit in 2012 aan Air Namibia gelewer is.Buiten die twee A330’s, het Air Namibia ook twee Airbus A319-100’s wat ingevolge ’n verhuringsooreenkoms tot hul oorspronklike toestand herstel en aan die eienaar terugbesorg moet word. Mnr. Leon Jooste, minister van staatsondernemings (SOE’s), het by navraag gesê “een van die A319’s is feitlik reg om afgelewer te word en die ander een behoort in April gereed te wees”. “Die koste (van die herstelwerk) sal eers finaal bekend wees nadat al die tegniese ondersoeke afgehandel is,” sê hy.Die A330’s, sê Jooste, sal na Malta geneem word om daar herstelwerk te ondergaan. Dit is een van die bestemmings in Europa waar Air Lease 82 aangedui die vliegtuie aan hom terug besorg kan word.Oor die kwessie van die vervalde lisensies, het Jooste gesê ’n moontlikheid om die probleem te oorkom, is om vlieëniers met geldige lisensies van elders te kontrakteur om die vliegtuie na Malta te vlieg. – ronelle@republikein.com.na

A330’s na Malta: Vlieëniers se lisensies verval

Kommentaar

Republikein 2025-08-18

Meld asseblief aan om kommentaar te lewer

A330’s na Malta: Vlieëniers se lisensies verval

Kommentaar

Republikein 2025-08-18

Meld asseblief aan om kommentaar te lewer

MELD AAN

Advertensie