Vleissindikate laat Reho-boere rooi sien

Ronelle Rademeyer - Veediefstalsindikate het tussen 25 Junie en 30 Julie vanjaar 25 beeste en 22 stuks kleinvee op plase in die groter Rehoboth-omgewing gesteel.Mnr. Frans Fisch, woordvoerder van die nuutgestigte buurtwag teen veediefstal by Rehoboth, sê in die afgelope week alleen is 12 beeste ter waarde van tussen N$10 000 en N$15 000 elk binne ’n radius van 10 km om die dorp afgemaai. “Ons vermoed hier is drie tot vier sindikate werksaam. Al die vleis kan nie deur die informele mark op Rehoboth opgeneem word nie. Van die vleis word ook aan die kapanamark in Windhoek gelewer,” sê hy.Statistiek deur 20 boere in die omgewing toon 144 beeste en 156 stuks kleinvee is die afgelope 12 maande in die groter Rehoboth-gebied gesteel, vertel mnr. Rainer Ling van die plaas Cowdray.Hy en ander boere op die Rehoboth-Uhlenhorst-pad patrolleer gereeld die gebied en het vroeër vandeesmaand verskeie welslae gehad. Ten minste 11 mense is danksy hulle in Julie deur die polisie van Rehoboth en Dordabis vir veediefstal aangekeer. Een van hulle was die berugte mnr. Clifford Fisch (37), wat in sewe ander sake ook op klagte van veediefstal teregstaan. Borgtog is dié keer aan hom geweier.Kort daarna is mnre. Sidney Cloete, Rudolf van Wyk, Relano Brendell en Benedict Cloete danksy die optrede van die nuwe buurtwag aangekeer.(Frans) Fisch sê ofskoon borgtog aanvanklik geweier is, het hulle tydens ’n formele borgtogaansoek daarin geslaag om vrygelaat te word. (Sidney) Cloete se borgtog beloop N$2 000 en die ander drie mans s’n N$1 000 elk.Fisch sê van die verdagtes in die polisie en buurtwag se visier gaan selfs sover om die vleis op sosiale media te adverteer.Mnr. Rynault van Wyk, wat op die plaas Sandputz vlak teen die dorp boer en ook ’n lid van die buurtwag is, sê sewe beeste is sedert 21 Junie by hom geskiet. Van hulle was koeie wat ver dragtig was.“Ons het te doen met blatante, brutale optrede deur misdadigers wat nie die reg vrees nie, want hulle betaal N$1 000 borgtog en gaan net voort,” sê hy.Hy sê die sindikate gebruik jaggewere met knaldempers asook jaglampe. “Hierdie is geoefende mense wat berekend optree. Benewens ons beeste wat hulle afmaai, word solarpompe gesteel. Ag, en die kleinvee word sommer in sedanmotors gebondel en weggery."Die ekonomiese verliese is vir ons omgewing onberekenbaar. Ons is nou by die punt waar ons ons beeste dag en nag moet oppas soos wat ’n mens skape oppas.’n Mens wonder net hoe kom hulle deur die padblokkades met bloed wat vanaf die voertuie drup.”Ling sê hierdie toename dui op die werksaamhede van sindikate wat vir ’n lewe steel. “Hierdie georganiseerde misdaad tas ons bestaan aan en dit tas die perspektief van die jeug aan. Ons kinders vra of hulle nog ’n toekoms in hierdie land het,” sê hy.Fisch sê die buurtwag is in die proses om as ’n reserviste-organisasie te registreer. Sover het hulle nog nie regsbevoegdheid nie, maar hy sê die samewerking tussen dié groep boere en die polisie is goed.

Vleissindikate laat Reho-boere rooi sien

Kommentaar

Republikein 2025-05-05

Meld asseblief aan om kommentaar te lewer

Vleissindikate laat Reho-boere rooi sien

Kommentaar

Republikein 2025-05-05

Meld asseblief aan om kommentaar te lewer

MELD AAN

Advertensie