Virus steel hokkieleier

Andrew Poolman – Die skielike afsterwe van mnr. Marc Nel op 59-jarige leeftyd is vir die hokkiegemeenskap 'n uiters gevoelige slag.Die talle huldeblyke sedert die nuus van sy heengaan Saterdag aan Covid-19 dui aan hoe 'n gewilde en gewaardeerde figuur Nel was, wat tot met sy afsterwe die president van die Namibiese Hokkie-unie (NHU) was.Nel was vir jare een van die vasberade kampvegters om vir Namibiese hokkie die geldelike struikelblokke vir die oprigting van kunsmatige Astro-bane vir veldhokkie uit die weg te ruim.Toe Nel in 2004 ná 'n vorige termyn van drie jaar as president van die NHU bedank en die leisels aan mnr. Jesse Schickerling oorgegee het, is berig dat hy toe reeds vir 28 jaar in die sport betrokke was – as 'n speler, afrigter, skeidsregter en administrateur.“Ek het op 14-jarige ouderdom begin hokkie en sokker speel, maar hokkie is die sport wat naaste aan my hart lê,” het Nel destyds vertel.“Hokkie word nie deur 'hooligans' gespeel nie. Van my beste vriende het ek in hokkie leer ken. Ek het ongelooflike kontakte buite die landsgrense opgebou.“Hokkie gee jou die gevoel dat jy deel is van 'n wêreldwye familie. Oral word jy met ope arms ontvang omdat jy met hokkie bekend is. Vir my was dit ewe veel plesier om as nasionale speler en internasionale blaser hokkie te dien.”In sy speeldae het Nel die nasionale junior en senior hokkiespanne verteenwoordig en later ook in Suid-Afrika vir universiteit- en weermagspanne gespeel. Hy het ook as jongman Namibië se eerste internasionaal gekwalifiseerde hokkieskeidsregter geword.Sy droom om Namibië die beste hokkiespelende land in Afrika te maak, het die afgelope jare gestalte gekry met die nasionale vroue- en manspanne se verskynings by wêreldbyeenkomste en op kontinentale vlak.“Nee nee nee... dit is sulke hartseer nuus! Marky, dankie vir alles – jou leiding in my loopbaan as skeidsregter, die toere wat ons saam meegemaak het... ons gaan jou so baie mis! Dankie en rus in vrede,” was Darryl Kotting se inskrywing onderaan die bekendmaking.Uit Nederland het die afrigter Sven van der Most geskryf: “Ek is so jammer oor die verlies. Ek het Marc in 2018 ontmoet en was beïndruk met sy liefde en visie vir Namibiese hokkie. Wat 'n aangename en vriendelike persoon. Ek sal jou mis en Namibiese hokkie sal jou mis. “Ek wens alle naasbestaandes baie sterkte toe deur hierdie moelike tye. Rus in vrede, Marc. Jy was en is 'n superster.”Die president van die Namibiese Nasionale Olimpiese Komitee, mnr. Abner Xoagub, sê hy was baie geskok en hartseer oor die tyding.“Hy was 'n uitstekende leier, 'n vaderfiguur in die hokkie-unie, 'n passievolle en gedrewe sportman wat altyd na die beste vir almal gestreef het. Wat 'n verlies vir sport en vir hokkie, nie net in Namibië nie, maar ook vir die groter wêreld.”

Virus steel hokkieleier

Kommentaar

Republikein 2025-09-02

Meld asseblief aan om kommentaar te lewer

Virus steel hokkieleier

Kommentaar

Republikein 2025-09-02

Meld asseblief aan om kommentaar te lewer

MELD AAN

Advertensie