Vir oom Des

Minette Brink - Daar is iets in die Karoo se water. Skrywers Olive Schreiner, Guy Butler en Etienne van Heerden is gebore of het grootgeword in dié gebied. Cradock is ‘n geharde, mooi wêreld met uitstekende weiding, ‘n oorvloed water en gesonde klimaat, sê die webwerwe. Ook ‘n raak beskrywing van ‘n ander boorling en woordmeester. “Maandag het Salomé drie keer in my vensters kom dans. Elke keer verleidelik, elke keer só mooi. Elke keer met ‘n skone belofte van onskuld, maar elke keer met ‘n stoute glimlag om die skuim van twyfel oor geloof te laat spat . . .”Vandag 80 jaar gelede is oom Des Erasmus die lewe in - met ‘n onblusbare liefde vir woorde en mense. Sy pad, vol regmatige en onregmatige opdraandes en afdraandes, lei hom na die koerantwese waar hy tot vandag, op hierdie oomblik, skouer aan die wiel bly. Gerhard Roux skryf in die voorwoord van Onder Hoogwater, een van oom Des se talle bundels: “Dit was die swaarkryjare van die koerantwese . . . Hy het nie net mense en hul gewoontes en omgewings leer ken nie, maar ook hul taal waarmee hy sy eie styl ingesout het. Hier staan ‘n woordkunstenaar met sy letters by die aambeeld.”Die koerantwese het oor die dekades verander, oom Des nie - kom storm of ellende. Ontelbare groentjies én gesoute hardebaarde in die bedryf is onder sy bekwame hande deur en geïnspireer deur die werksetiek van dié laaste van die ware Namibiese en ander nuushonde. Oom Des ken nie van nié werk nie. Want dis in sy bloed. Elke storie, elke kort berig, elke foto-onderskrif word aangepak en as juweel aangebied. Respek vir die onderwerp, respek vir die mens. “Stories kan nooit opraak nie. Lig net jou lui agterent en gaan háál hom – hy gaan nie na jou toe kom nie. Skryf elke storie vir die mense. En blaas nóóit jou eie beuel nie. As jy nie alles wil insit met die skryf nie, wat soek jy nou eintlik hier? Het jy ‘n woordeboek? Gebruik hom . . . ” Respek vir die beroep.Die Swakop-kantoor is neerdrukkend stil sedert hy en sy Annelief weg is. Ek sit deesdae alleen op sy rookbankie agter in die werf. Met my eie Stormers-mussie, nes syne, gewapen teen die koue. Slaan my oë op na die nesbouers. Waar sal my woorde vandaan kom? Ek mis die staaltjies en die grappe, die klam oë oor alles wat snaaks én seer maak. Die gekners oor die onregverdigheid van die lewe en die wyse ou hand op ‘n moeë skouer. Hulle is nou tuisskrywers, sê oom Des. En dit sukkel om die nuwe roetine te verwerk. Maar voor die groot rusteloosheid hulle beetkry, vat hulle liewer die pad, spoorlangs storielangs. Want dis in ‘n mens se bloed. Kry end met die beuelblasery en die getob. Sit skouer aan die wiel.Ek staan op van die rookbankie. Dankie, oom Des, jy’t ons mooi oor die lewe geleer. En soos oom sê: “Daar’s geen verskil tussen om met konings en met slawe te praat nie, solank jy net by jou eie stand kan hou. Nie ‘n treetjie op nie, ook nie ‘n treetjie af nie. Jy bly net jy.”Baie geluk met oom se verjaardag. Môre waai weer die oostewind. Sonder enige tekens van verraad.

Vir oom Des

Kommentaar

Republikein 2025-05-16

Meld asseblief aan om kommentaar te lewer

Vir oom Des

Kommentaar

Republikein 2025-05-16

Meld asseblief aan om kommentaar te lewer

MELD AAN

Advertensie