Vies Gatland kap Rassie en Faf

Stephen Nell – Ná 'n handvol eensydige wedstryde het die kwik op die Britse en Ierse Leeus se toer skielik die hoogte ingeskiet nadat hulle Woensdagaand in die Kaapstad-stadion teen 'n Suid-Afrika A-span verloor het.Het 'n mens gister na Warren Gatland, die Leeus se afrigter, geluister, sou jy nie eens gedink het hulle het verloor nie.Sover dit hulle betref, het die SA A-span die Springbokke se geheime verklap en Gatland het sommer ook 'n paar houe in die rigting van die Bok-skrumskakel Faf de Klerk en die Suid-Afrikaanse Rugbyunie se direkteur van rugby, Rassie Erasmus, ingekry.Die Britse media het 'n vroeër uitlating deur Erasmus – dat hy seker is die Leeus sal nie “bang” wees vir 'n tweede wedstryd teen die SA A-span nie – vertolk as 'n insinuasie dat die toerspan juis dit is.“Ek dink Rassie probeer ons net op ons agterpote kry, iets waartoe hy soms in staat is,” het Gatland gesê voordat hy ook 'n stekie ingekry het.“Gisteraand was hy (Erasmus) 'n waterdraer wat op die veld opgehardloop het, maar as jy in daardie hoedanigheid op die veld hardloop, behoort jy seker te maak dat jy water saam met jou dra.“Ek begryp nie wat Rassie se rol was nie. Jy hardloop mos nie op die veld om boodskappe oor te dra as jy 'n waterdraer is wat nie water dra nie. My raad aan hom is om volgende keer seker te maak hy vat water saam!”En nee, sê Gatland, die Leeus is nie ná hul nederlaag bang nie.“Ons is opgewonde. Dit was 'n fisieke wedstryd. Ons weet wat gaan kom en hulle sal vandag seer lywe hê,” sê hy.“Ons verdediging van die rolmaalbewegings was goed, ons het baie goed geskrum, ons het hulle onverhoeds betrap met ons optel-en-dryf-strategie en dit was 'n kans om aan daardie fasette te skaaf.“Op die aanval was ons nie klinies nie, maar daar was geleenthede wat ons nie afgerond het nie en dit sal ons 'n paar dinge gee om in die komende naweek en volgende week aan te werk.“Die ouens was ná die wedstryd vol vertroue in die kleedkamer en onder die indruk dat hulle die reeks kan wen.”Wat De Klerk betref, meen Gatland dat die geel kaart wat hy aan die einde van die eerste helfte vir sy duikslag op Wyn Jones gekry het, eintlik rooi moes wees.“Ek kan nie verstaan hoe gesê is daar was nie kontak met die kop nie. Iemand het ander beeldmateriaal as ek gesien,” sê hy.Intussen het Gatland vir Alun Wyn Jones op die Leeus se plaasvervangersbank vir môre se wedstryd teen die Stormers in die Kaapstad-stadion gekies.Dit sal dan maar net twee dae wees sedert Jones hom by die Leeus se kamp aangemeld het, maar daar word gehoop dat hy kan wys dat hy vir die eerste toets teen die Bokke gereed is.Jones is deur Conor Murray as toerkaptein vervang nadat hy 'n skouerbesering in die Leeus se opwarmwedstryd teen Japan opgedoen het, maar het onverwags vinnig herstel.• Britse en Ierse Leeus: Stuart Hogg (k), Josh Adams, Elliot Daly, Robbie Henshaw, Duhan van der Merwe, Marcus Smith, Ali Price, Jack Conan, Hamish Watson, Tadhg Beirne, Jonny Hill, Adam Beard, Tadhg Furlong, Luke Cowan-Dickie, Rory Sutherland. Reserwes: Jamie George, Mako Vunipola, Zander Fagerson, Alun Wyn Jones, Sam Simmonds, Gareth Davies, Chris Harris, Louis Rees-Zammit. – Netwerk24FOTOAlun Wyn Jones is môre op die Britse en Ierse Leeus se reserwebank teen die Stormers in Kaapstad. Foto Getty Images

Vies Gatland kap Rassie en Faf

Kommentaar

Republikein 2026-11-03

Meld asseblief aan om kommentaar te lewer

Vies Gatland kap Rassie en Faf

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.