Vier vroue Nuwejaarsnaweek verkrag

Die polisie ondersoek die verkragting van ’n 16-jarige meisie Saterdag omstreeks 21:00 op Mariental.
Sy en ’n vriendin is gestuur om geld te gaan trek en op pad huis toe het 'n man haar glo aan haar hare gegryp en onder ’n boom ingesleep en verkrag. Haar vriendin het weggehardloop.
Ná die daad het die man glo ook haar selfoon en N$200 gesteel. Hy is nog nie in hegtenis geneem nie.
• ’n 32-jarige vrou is Saterdag om 02:00 na bewering op Groo Aub deur ’n 45-jarige man verkrag. Hy is in hegtenis geneem.
• In nog 'n voorval Saterdag (tussen 01:00 en 02:00) het ’n 38-jarige man glo ’n 23-jarige vrou in Santa Clarastraat in Otjomuise verkrag. Hy is in hegtenis geneem.
• ’n Onbekende verdagte het glo Saterdag omstreeks 06:00 in Ben Appollusstraat in Katutura ’n 33-jarige vrou verkrag. Hy is nog op vrye voet.