Vier-komma-iets

Lloyd Zandberg - Ek kan dit amper nie glo nie, maar vandag praat ek oor getalle, desimale en statistiek. Dit is teen my beginsels. Ek is geleer om nie ’n opinie oor iets te hê as ek dit nie verstaan of kennis van die spesifieke veld het nie. Indien jy dit nog nie weet nie, noem ek dit weer.

Hoofsaaklik vir my eie veiligheid. Ek kan nie Wiskunde doen nie. Ek sal eerder die Comrades sonder tekkies hardloop of koek sonder meel probeer bak as dit beteken ek hoef nie ’n sakrekenaar op te tel nie.

Een plus een is een ding, maar sodra jy ‘n vierkantswortel naby my bring, dink ek dadelik aan kos en hoe vinnig ek kan draf. Tot vandag toe weet ek nie wat kwadraat of "cos" beteken nie. "X" en "Y" is net letters van die alfabet. Dus saal ek nou vir myself ‘n perd op wat ek nooit sal kan ry nie, maar ten minste kan hy hom dik eet aan al die vierkantswortels wat oor ons pad kom.

So, hiermee gaan ek dus so een of twee statistieke met julle deel. En moenie stres nie, as jy ook net-net Wiskunde deurgekom het, sal jy steeds kan byhou. Kry net ’n stuk papier en ’n potlood in geval jy nie kan byhou nie. Daar gaan nie ’n vasvrakompetisie ná die tyd wees nie, ontspan.

Ek probeer net goed in perspektief sit. Vir jou en vir my.

Net ’n nota: ek stel voor jy sit tydens die lees van hierdie rubriek. As jy van spookasem of soetgoed hou, koop vir jou ’n klomp. Dit help. Ek het na ‘n foto van ‘n waterval gekyk en ek was steeds onkant gevang. Dit is nou hier waar ek begin nervous raak, want niks van die volgende word uit my duim gesuig nie. Ongelukkig nie.

Vanoggend doen ek bietjie navorsing. Niks ergs nie, maar genoeg om die hierdie stuk te skryf. Dit pla my al ’n geruime tyd. Elke dag by die werk hoor ek van mense wat verkrag word. Elke liewe dag.

Toe wil ek weet, van hoeveel mense praat ons? Let’s talk numbers. Maak tee met baie suiker in en gaan sit iewers.

Tans word 42 596 mense per jaar in Suid-Afrika verkrag.

Hou op. Nee, régtig, hou net op. Jy sien, nou wil ek ophou skryf, want hierdie bitter smaak in my mond begin my dag belemmer. Maar die perd moet gery word. Kom ons gesels verder. Ek moet net hier noem dat ek my wiskunde hier moes toepas, so as ek ’n desimaal of twee uit is, is ek vreeslik jammer. Ek probeer niemand met my verstand beïndruk nie. Daar is belangriker dinge om te doen.

As ons daai getal bietjie skommel, kan ons sê daar word daagliks byna 116 mense per dag verkrag. Wag, ek is nie klaar nie. Ek hoop my somme laat my nie in die steek nie. Dit beteken dan verder dat ‘n gemiddeld van amper vyf mense per dag vernietig word. Kan iemand vir ons ‘n grappie vertel of vir Barney op die TV kry? Deel jou spookasem met ons, asseblief.

Ek wil nie meer op hierdie planeet woon nie. Nou wat nou? Wat probeer ek sê? Ek weet nie. Hoe kan ons dit beter maak? Wat moet ons doen om hierdie situasie te verbeter?

Hoewel hierdie statistieke net op Suid-Afrika van toepassing is, maak dit nie saak nie. Geen mens hoef daardeur te gaan nie. Hoe lyk die getalle in Namibië en in die res van die wêreld? Hoeveel duisende ander verkragtings gebeur daagliks, maar word nooit aangemeld nie? Niemand verdien dit nie.

Hierdie rubriek, met sy navorsing en somme, het my min of meer ‘n halwe dag geneem om bymekaar te sit. Dit beteken moontlik dus dat nog twee mense tydens my skrywe verkrag is.

Dit is seker nie akkuraat uitgewerk nie, maar maak dit saak? Dit moet ophou. Nou, dadelik. En net ons kan dit stop. Dit is ‘n baie makliker som.