Vervoer-SOE’s stil oor salarisinperkings

Ronelle Rademeyer - Namibië se drie staatsondernemings (SOE’s) vir die vervoer- en logistiekbedryf het gister tydens ’n bespreking oor die impak van die pandemie op hul bedrywighede, ’n vraag ontwyk oor of salarisinperkings een van die wyses is waarop hulle koste besnoei.Dié vorm van besnoeiing is een van die besparingsmaatreëls wat maatskappye in die private sektor oorweeg om ondergang te voorkom. Die grootbase van Air Namibia, TransNamib en NamPort het by die daaglikse Covid-19-gesprek in Windhoek uitgebreid vertel hoeveel hulle operasionele bedrywighede ingeperk is. Nie die waarnemende bestuurder van Air Namibia, mnr. Elia Erastus, die waarnemende hoof uitvoerende beampte van NamPort, mnr. Kavin Harry, of die hoof uitvoerende beampte van TransNamib, mnr. Johnny Smith, het egter die media se vraag oor of na verkleinde salarisse gekyk word om koste te besnoei, beantwoord nie.Erastus het gesê Air Namibia se inkomste is weens die reisverbod “basies zero”, terwyl Kavin sê NamPort se operasionele bedrywighede het gekrimp tot 50% van die kapasteit. Volgens Smith het die inperkingsmaatreëls TransNamib se bedrywighede met 60% afgeskaal. Hy het gesê die nasionale spoorkarweier probeer finansieel “neus bo die water hou” en beoefen sosiale afstand tussen werknemers deur net een skofgroep van tien of minder mense op ’n slag te laat werk.Smith sê aangesien net noodsaaklike goedere per pad vervoer word en vliegtuie nie vliegtuigbrandstof benodig nie, is die brandstofverbruik in die land baie laag. TransNamib vervoer dus in die inperkingstyd nie naastenby die hoeveelheid brandstof met treine wat hy normaalweg doen nie.Harry sê NamPort het net drie van die elf dokke tans in gebruik. Hulle fokus ook net op sekere tipes vrag. Hy vrees egter die hawe kan só deur vrag oorlaai word wanneer die inperkings gelig word, dat dit nie die druk sal kan hanteer nie. Erastus sê Air Namibia het na ’n drie jaar-sakeplan vir sy oorlewing gekyk, maar weens die pandemie moet dit aangepas word.Verhoogde vlugfrekwensies in die streek is volgens hom een van die redery se planne vir oorlewing in die toekoms.Hy sê Air Namibia gaan reeds van volgende week af advertensies oor die planne vir binnelandse vlugte publiseer. Hy sê dit sal geskied in pas met “wat die president (Hage Geingob) oor die uitfasering van die inperkingsmaatreëls gaan aankondig".’n Ontledingsdokument wat verlede jaar deur die voormalige minister van finansies, mnr. Calle Schlettwein, aan die kabinet voorgelê is oor Air Namibia kritieke finansiële situasie, toon die regering het in die 20 jaar tussen 1999 en 2019 ’n onvolhoubare N$8,3 miljard in die nasionale rederye gepomp.“Hoe gouer Air Namibia gelikwideer word, hoe beter,” was sy aanbeveling.Volgens ’n ingeligte bron in die lugvaartbedryf beloop Air Namibia se lopende uitgawes meer as N$100 miljoen per maand.

Vervoer-SOE’s stil oor salarisinperkings

Kommentaar

Republikein 2025-05-01

Meld asseblief aan om kommentaar te lewer

Vervoer-SOE’s stil oor salarisinperkings

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie