Vervaardigers bly in SA al is GM op pad
Motorvervaardigers sê hulle is steeds verbind tot die Suid-Afrikaanse mark en hulle gaan nêrens heen nie.
Die motorreus General Motors (GM) het verlede week planne aangekondig om pad te gee uit Suid-Afrika as deel van sy strategie om uit sekere internasionale markte te onttrek, maar ander motorvervaardigers is nie van plan om die maatskappy se voorbeeld te volg nie.
GM het bevestig dat sy besluit nie geraak is deur plaaslike ekonomiese en politieke faktore, soos die land se onlangse afgradering na rommelstatus nie.
Dit is deel van 'n wêreldwye herstruktureringsplan wat reeds in 2013 begin het toe hy uit Australië onttrek het, sê die motorvervaardiger.
GM se mededingers stem saam oor die plaaslike beleggingsomgewing.
Matt Gennrich, hoofbestuurder van kommunikasie by Volkswagen Suid-Afrika (VWSA), sê die maatskappy neem langtermynbeleggingsbesluite wat nie geraak word deur “politiese, maatskaplike en ekonomiese probleme oor die korttermyn nie”.
VWSA het in 2016 sowat R5,5 miljard belê in nuwe produkontwikkeling en die nuwe produkte gaan na verwagting in 2018 bekend gestel word, sê Gennrich. Hy beklemtoon dat VWSA verbind is tot hierdie belegging en hulle verwag groei in die motorbedryf.
VWSA het in 2016 sowat 130 000 voertuie vervaardig vergeleke met sowat 123 000 in 2015.
Ford, wat sedert 1923 in Suid-Afrika bedrywig is, sê ook hy is verbind daartoe om sy onderneming in Suid-Afrika uit te bou. Die maatskappy het in 2016 altesaam 73 856 voertuie in Suid-Afrika verkoop.
In 2017 het Ford reeds 23 732 voertuie verkoop, volgens Alisea Chetty, kommunikasiebestuurder. Die maatskappy het die aantal voertuie verdubbel wat hy by sy Silverton-aanleg in Pretoria vervaardig.
Chetty sê daar is verskeie probleme in Suid-Afrika, maar die maatskappy bly positief oor die geleenthede wat steeds in die plaaslike mark bestaan.
Diederik Reitsma, hoofbestuurder van kommunikasie van BMW Suid-Afrika, sê dié maatskappy neem 'n langtermynsiening rakende sy beleggings. Die maatskappy het onlangs R6 miljard belê in sy Rosslyn-aanleg in Pretoria.
GM het 5% verteenwoordig van die 604 000 voertuie wat in 2016 in Suid-Afrika vervaardig is, sê die Nasionale Vereniging van Voertuigvervaardigers van Suid-Afrika.
GM het Vrydag bevestig dat hy begin het met 'n artikel 189-proses en dat sowat 589 werknemers geraak word. -Netwerk24/Fin24
GM het bevestig dat sy besluit nie geraak is deur plaaslike ekonomiese en politieke faktore, soos die land se onlangse afgradering na rommelstatus nie.
Dit is deel van 'n wêreldwye herstruktureringsplan wat reeds in 2013 begin het toe hy uit Australië onttrek het, sê die motorvervaardiger.
GM se mededingers stem saam oor die plaaslike beleggingsomgewing.
Matt Gennrich, hoofbestuurder van kommunikasie by Volkswagen Suid-Afrika (VWSA), sê die maatskappy neem langtermynbeleggingsbesluite wat nie geraak word deur “politiese, maatskaplike en ekonomiese probleme oor die korttermyn nie”.
VWSA het in 2016 sowat R5,5 miljard belê in nuwe produkontwikkeling en die nuwe produkte gaan na verwagting in 2018 bekend gestel word, sê Gennrich. Hy beklemtoon dat VWSA verbind is tot hierdie belegging en hulle verwag groei in die motorbedryf.
VWSA het in 2016 sowat 130 000 voertuie vervaardig vergeleke met sowat 123 000 in 2015.
Ford, wat sedert 1923 in Suid-Afrika bedrywig is, sê ook hy is verbind daartoe om sy onderneming in Suid-Afrika uit te bou. Die maatskappy het in 2016 altesaam 73 856 voertuie in Suid-Afrika verkoop.
In 2017 het Ford reeds 23 732 voertuie verkoop, volgens Alisea Chetty, kommunikasiebestuurder. Die maatskappy het die aantal voertuie verdubbel wat hy by sy Silverton-aanleg in Pretoria vervaardig.
Chetty sê daar is verskeie probleme in Suid-Afrika, maar die maatskappy bly positief oor die geleenthede wat steeds in die plaaslike mark bestaan.
Diederik Reitsma, hoofbestuurder van kommunikasie van BMW Suid-Afrika, sê dié maatskappy neem 'n langtermynsiening rakende sy beleggings. Die maatskappy het onlangs R6 miljard belê in sy Rosslyn-aanleg in Pretoria.
GM het 5% verteenwoordig van die 604 000 voertuie wat in 2016 in Suid-Afrika vervaardig is, sê die Nasionale Vereniging van Voertuigvervaardigers van Suid-Afrika.
GM het Vrydag bevestig dat hy begin het met 'n artikel 189-proses en dat sowat 589 werknemers geraak word. -Netwerk24/Fin24
Kommentaar
Republikein
Geen kommentaar is op hierdie artikel gelaat nie