Verstel jou bril se lense

WILLEM DE WET SKRYF:

Neem aan die skrywer van daardie insetsel van Vrydag val nie in sy/haar eie veroordeelde kategorie nie so ek wil begin met:

Jong man of dame, as daardie ou, middeljarige wit mans waaroor jy gal braak na 20 jaar se hinderlae, sabotasie, regstelling, veroordeling, diskriminasie en kniehaltering nog steeds hul besighede of posisies wat hulle met sweet en swaarkry opgebou en bestuur het beklee, dan doen hulle seker iets reg.

Kyk na hul handewerk en leer van hulle eerder as om te sit en gal braak oor jy hom nie uit eie krag en oortuiging kan nadoen of iets uit jou eie kan begin en 'n sukses daarvan maak nie. Min van die goed in die land het die toets van tyd deurstaan. Dit wat self begin, gedryf en met trots bestuur is, sal bly staan, maar dit wat polities geplunder en ge-"empower" is, lê aan flarde.

Haal die kleurlense af, kyk om jou rond, leer van die wat suksesvol is en maak 'n positiewe verskil.