Verregses in verkiesingsriller

Oostenryk was gister by ‘n politieke kruispad voor die finale uitslae van ‘n verkiesing wat op ’n mespunt gebalanseer is en wat kan meebring dat die land die eerste lidland van ‘n Europese Unie (EU) word met ‘n president van die verregses wat teen immigrasie gekant is.
Voorlopige uitslae láát Sondag het Norbert Hofer van die Vryheidsparty (FPO) ‘n voorsprong van 3,8 persentasiepunte gegee.
Die haarbreedte voorsprong van net 144 006 stemme kon egter uitgewis word met die tel van ongeveer 700 000 posstemme, wat nog uitstaande was.
Die glimlaggende 45-jarige vuurwapenentoesias, Hofer, het aanklank gevind by Oostenrykers wat ongemaklik is met die rekordaantal asielsoekers wat Europa verlede jaar tydens die vlugtelingkrisis binnegestroom het. Nampa/AFP