'Vermy vreemdelinge by kruisings en sluit deure'

Tanja Bause Drie veiligheidswagte van G4S is verlede week op die perseel van 'n besigheid wat hulle opgepas het, vasgebind en met wapens aangehou. Sewe mans het oor die perseel se muur gespring en die vensters langs die voordeur gebreek. Volgens supt. Cillie Auala, woordvoerder van Windhoek se stadspolisie, het die verdagtes goedere ter waarde van N$60 000 gesteel. Dit sluit rekenaars, skootrekenaars en kontant in. Woensdag is drie mans in Ibisstraat in Hochland Park betrap waar hulle probeer het om by 'n huis in te breek. “Volgens inligting wat ons ontvang het, is 'n saak van huisbraak teen dieselfde mans vroeër die dag aanhangig gemaak toe hulle by 'n huis in Secretarstraat, ook in Hochland Park, wou inbreek,” het Auala gesê. Die verdagtes het oor die huis se muur gespring, maar gevlug toe die huiseienaar hulle sien. Op die hoek van Mandume Ndemufayo- en Toivo ya Toivo-rylaan in die suidelike nywerheidsgebied het verdagtes vir 'n motoris aangedui sy voertuig se wiel is pap. Toe die bestuurder uit die voertuig klim om ondersoek in te stel, het die verdagtes die passasiersdeur oopgemaak en 'n handsak gesteel. In die handsak was N$120 000, 3 000 euro, 'n selfoon en persoonlike dokumente. Die verdagtes het in 'n sedanvoertuig met 'n persoonlike nommerplaat weggejaag. Beeldmateriaal van die voorval was beskikbaar en een verdagte is geïdentifiseer. “Ons waarsku weereens die publiek om nie met vreemdelinge by kruisings te praat nie. Maak seker jou voertuig se deure is gesluit en moenie waardevolle items op sitplekke laat waar almal dit kan sien nie,” het Auala gesê. Verlede naweek het 'n voetganger, mnr. Kapoko Diamond (49), op die toneel gesterf na hy deur 'n motorfiets omgery is. Die motorfietsbestuurder, mnr. William Koopman (30), het ook op die toneel gesterf. Die ongeluk het in Onafhanklikheidsrylaan plaasgevind. “Ons maan alle motorfietsbestuurders om soos alle ander padgebruikers by spoedbeperkings te hou,” het Auala gesê. Republikein het inligting ontvang van 'n voorval in 2014 waartydens Koopman twee voetgangers by die kruising van Sam Nujoma-rylaan en die westelike verbypad omgery het. Beide die voetgangers het op die toneel gesterf.

'Vermy vreemdelinge by kruisings en sluit deure'

Kommentaar

Republikein 2025-07-28

Meld asseblief aan om kommentaar te lewer

'Vermy vreemdelinge by kruisings en sluit deure'

Kommentaar

Republikein 2025-07-28

Meld asseblief aan om kommentaar te lewer

MELD AAN

Advertensie