Vermeende veediewe se turf sit

Elvira Hattingh Die Rehoboth Veemisdaadorganisasie (RLCO) het saam met die polisie verlede week 'n reusedeurbraak gemaak in 'n veediefstalsaak toe hulle nie net die waarskynlike meesterbrein vasgetrek het nie, maar ook ander wat glo herhaaldelike veediewe is.Die nege beskuldigdes het Woensdag en Donderdag in die hof verskyn en hulle volgende verskyning is op 6 Februarie. 'n RLCO-lid, mnr. Rynault van Wyk, het gister aan Republikein gesê die Rehoboth-boerderygemeenskap loop al vir die afgelope jaar onder 'n vlaag van veediefstal deur. “Hierdie blik wurms is nou eindelik oopgemaak deur die pas gestigte RLCO, danksy die aanvoerwerk van die wakker en uiters behulpsame mnre. Frans Fisch en Wit Piet van Wyk. Die groot paaie wat na Rehoboth lei, is nag vir nag bewaak om die aanslag op die geteisterde boere te probeer hokslaan.”Van Wyk sê hulle kon 'n groot deurbraak in die saak maak nadat hulle inligting ontvang het van vermeende vleisdiewe wat in besit was van drie kleinveekarkasse, sebravleis en drie beeskarkasse, asook vier lewende bokke. “Dit is deur die beskuldigde, mnr. Patrick Velskoendraer, van mnr. Bayer Olivier se plaas Areb-Noord na sy woning op Rehoboth vervoer. “Danksy vinnige polisieoptrede en die wakker RLCO-lede, mnre. Charlton van Wyk, Wit Piet van Wyk, Frans Fisch en myself, kon ons die geheimenisse van die afgelope tyd se veediefstal openbaar. “Tydens opgrawings rondom Velskoendraer se huis het ons op baie diere se pensmis en afval afgekom. Swaar koevoetysters, pangas en slagmesse is ook gevind,” het Van Wyk gesê. “Onder die waaksame oog van die polisie en met behulp van Velskoendraer se getuienis op die toneel, het ons die een na die ander beesdief uitgerook. “Ná mnr. Richard Jakobus van der Bergh (alias Riaan) ondervra is, het die spoor reguit gelei na 'n man wat plaaslik bekend is as iemand wat van mooi motors hou, mnr. Sydney Cloete, en sy neef Engelhardt Cloete. Ander verdagtes wat in hegtenis geneem is, sluit in mnr. Harold Fliede, Moses Garagab en ene Diesel.“Voor sononder was al die beskuldigdes agter slot en grendel. Net die beweerde meesterdraadstriksteller, Rudolf (alias Poephol) van Wyk, was nog op vrye voet,” het Van Wyk gesê.Van Wyk sê die RCLO-boereorganisasie het nie gerus nie en aangesien hulle hul oor op die grond gehou het, was die laaste beskuldigde binne drie dae ná die ander gevang. Van Wyk sê volgens die RCLO voer die beskuldigdes hul misdade uit met 'n wit, afgeleefde Mazda Mitch-voertuig met Swakopmund-registrasiemerke, asook 'n baie ou, ligbruin Toyota Hilux-bakkie met Windhoek-registrasiemerke.DROOGTE ÉN VEEDIEFSTALIntussen het die RLCO 'n brief aan Rehoboth se landdros en staatsaanklaer geskryf en gevra daar moet opgetree word om die aanslag op die boeregemeenskap te staak. “Ons ervaar tans droogte en kan nie terselfdertyd veediefstal die hoof bied nie. Ons vra dat julle help om gewoontemisdadigers in die tronke te hou en te keer dat dieselfde misdaad herhaaldelik gepleeg word,” lui die brief. Van Wyk, self 'n plaasboer en afslaer, het swaar verliese onder veediefstal gely nadat 20 van sy dragtige koeie geslag is. Hy spreek sy dank uit teenoor die polisie en die wakker optrede van die RLCO, maar is nie tevrede met die regstelsel nie. “Dit blyk dat hierdie kriminele, wat keer op keer met bitter baie moeite en onkoste gevang word en aan die howe uitgelewer word, elke keer op belaglike borgtogvoorwaardes uitkom – net om weer dieselfde oortredings te begaan. “Dis 'n futiele oefening,” het Van Wyk gesê.Hy sê hy hoop die Namibiese gemeenskap sal saamstaan en daarop aandring dat die regstelsel dringend aangepas moet word. “Die beskuldiges kry borgtog, sonder om boere se skade in berekening te bring. Ek alleen het N$300 000 se vleisskade gely – en dan bring ek nie eens die produksiewaarde in berekening nie.”

Vermeende veediewe se turf sit

Kommentaar

Republikein 2025-11-03

Meld asseblief aan om kommentaar te lewer

Vermeende veediewe se turf sit

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.