Vermeende stroper doodgeskiet

Francoise Steynberg - 'n Vermeende stroper is Vrydagaand in die Bwabwata Nasionale Park in die noordooste van die land doodgeskiet.Nóg twee vermeende stropers is gewond en 'n Namibiese man is in hegtenis geneem. Hy het gister in die landdroshof op Katima Mulilo verskyn, het adj.komm. William Peter bevestig. Op 28 Desember is twee stropers in Bwabwata ná 'n skietgeveg doodgeskiet en 'n week daarvoor nóg een nadat hy op die teenstropery-eenheid geskiet het. Volgens Peter spruit Vrydag se voorval ook uit 'n oor-en-weer skietery tussen stropers en veiligheidsmagte van die teenstropery-eenheid. “Die teenstroperymagte het vir verdagte stropers in die park aan die westelike kant van die Kongola-gebied gesoek en toe hulle gevind is, het die stropers op die polisie begin losbrand,” het Peter gesê. “Die verdagtes is met twee vuurwapens in hul besit gekry. Daar was geen sterfgevalle aan die kant van die wetstoepassers nie.” Die identiteit van die oorledene is nog nie bekend nie, want sy naasbestaandes is nog nie ingelig nie. 'n Namibiese Sansprekende pensioenaris, mnr. Musiliwa Tutsu (61), het gister op drie klagte in die landdroshof op Katima Mulilo verskyn. Die klagte sluit in die betreding van 'n nasionale park sonder 'n permit van die ministerie van die omgewing en toerisme asook die onwettige besit van vuurwapens en ammunisie.Tutsu is glo tydens sy inhegtenisneming Vrydagaand met twee haelgewere en ammunisie vir 'n haelgeweer in sy besit gevind. Die staatsaanklaer, mnr. George Matali, het borgtog teengestaan: “Die ondersoek is nog nie afgehandel nie en die moontlikheid bestaan dat ander verdagtes ook nog in hegtenis geneem kan word. Weens die sensitiwiteit van die saak van stygende wildstropery in nasionale parke, is dit nie in die belang van die samelewing dat die beskuldigde op borgtog vrygelaat word nie.” Tutsu bly in aanhouding en landdros Vincent Nzaca het die saak tot 27 April vir verdere ondersoek uitgestel. Die beskuldigde sal sy eie verdediging hanteer. Voorts doen Peter 'n beroep op die publiek om hulle van sulke onwettige aktiwiteite te weerhou.“Ons vra ook die gemeenskap om inligting te verskaf wat kan lei tot die inhegtenisneming van onwettige jagters en diegene wat onwettig in die besit van vuurwapens en ammunisie is wat gebruik word om wild en beskermde spesies binne en buite ons parke en bewaringsgebiede te jag,” het hy gesê. Die polisieondersoek duur voort.Altesaam 101 olifante is in 2016 in Bwabwata gestroop.

Vermeende stroper doodgeskiet

Kommentaar

Republikein 2025-06-18

Meld asseblief aan om kommentaar te lewer

Vermeende stroper doodgeskiet

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie