Vermeende skaapdief wéér vasgetrek

Helené Bam - Die vermeende skaapdief mnr. Clifford Fisch (35) is wéér in hegtenis geneem - die keer by ’n padblokkade naby Rehoboth . Kort voordat hy in hegtenis geneem is, het boere in die omgewing ’n verdagte wit bakkie by die polisie op Rehoboth aangemeld waarna verskeie padblokkades in die omgewing opgerig is. Die polisie het Fisch en vier medepligtiges, wat 12 lewende skape agterop hul bakkie vervoer het, verlede Donderdag by ’n padblokkade aangekeer en in hegtenis geneem. Ná verdere ondersoek deur die polisie is vasgestel dat die 12 skape van die plaas Stalhart, sowat 29 km noord van Rehoboth, gesteel is. Die skaapwagter van Stalhart, mnr. Kalistus Maronga, is ná polisieondervraging ook in hegtenis geneem omdat die polisie vermoed hy, Fisch en die vier ander verdagtes is kop in een mus. Fisch is die eerste keer, op 23 April, in hegtenis geneem nadat hy na bewering ses skape van mnr. Ulli Bräuer op die plaas Kous gesteel het. Sy voertuig is toe ook deur boere op die hervestigingsplaas Versailles gesien en as verdag by die polisie aangemeld. Die hervestigingsboere het toe vir Bräuer in kennis gestel waarna die polisie vir Fisch by ’n padblokkade vasgetrek het Nadat Fisch in April vasgetrek is, het polisiebeamptes in hul voertuig saam met Fisch, wat self sy bakkie bestuur het, na die omgewing van die beweerde misdaadtoneel gery. Dit was in die hoop om meer duidelikheid oor die middag se gebeure te kry. Bräuer en sy vrou, Angelika, het met hul aankoms vir Fisch deur sy bakkie se oop venster gekonfronteer. Fisch het toe glo probeer wegjaag. Mnr. Rainer Ling, boer van die plaas Cowdray, het tydens die voorval aan die ander kant van die bakkie gestaan. Ling het met Fisch se wegkomslag langs die bakkie gehardloop en aan die vensterraam probeer vashou. Met die momentum van die voertuig is hy sowat 30 m ver gesleep. Toe Ling nie langer kon vashou nie, het hy op die grond neergeval en in die proses drie spiere in sy skouer geskeur. Bräuer het tydens die drama aan die tralies agterop die bakkie vasgehou en homself tot op die bak van die bakkie opgetrek. Fisch het sowat 100 m verder gejaag met Bräuer agter op die bak, waarna hy (Fisch) glo deur Ling en Bräuer se vrou gestop is toe hulle voor hom in die pad met twee voertuie stilgehou het. Fisch het toe sowat 2,5 km verder gery voordat hy deur polisiebeamptes voorgekeer is. Twee vuurwapens en ’n assegaai is in die voertuig gevind. Alhoewel die vuurwapens geregistreer is, is dit nie in Fisch se naam nie. Fisch het vir dié voorval in April vir die onwettige besit van ’n vuurwapen in die Rehoboth-landdroshof verskyn en is op borgtog van N$2 000 vrygelaat. Vir die ses klagte van veediefstal en kwaadwillige beskadiging van eiendom het hy in die landdroshof op Dordabis verskyn en is hy op borgtog van N$5 000 vrygelaat. Fisch en sy vyf medebeskuldigdes, mnre. Willem Jacob Swartz (46), Kalistus Maronga, Rudolf van Wyk (40), Rudolf Frederick (39) en Cloris Kasouna (23) het Maandag op aanklag van veediefstal verskyn en kom vandag weer in die hof voor. Swartz, die bestuurder van die bakkie wat verlede Donderdag vasgetrek is, is Maandag borgtog van N$3 000 toegestaan.

Vermeende skaapdief wéér vasgetrek

Kommentaar

Republikein 2026-03-13

Meld asseblief aan om kommentaar te lewer

Vermeende skaapdief wéér vasgetrek

Kommentaar

Republikein 2026-03-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.