Vermeende moordenaar verongeluk toe hy vlug

’n 29-jarige man het Dinsdag op die D860-pad naby Schlip verongeluk nadat hy na bewering kort voor dit ’n moord op die plaas Gobosoab gepleeg het.
Mnr. Eric Edwin Isaakz is op slag dood toe hy in die voertuig van die vermoorde mnr. Martin Roman Pfaller (42) gevlug en dit sowat 6 km verder van die pad geloop en omgeslaan het, het adj.komm. Kauna Shikwambi, nasionale polisiewoordvoerder, Vrydag bevestig.
Sy sê Pfaller en Isaakz is voor die voorval saam op Schlip opgemerk.
Isaakz het Pfaller glo op die plaas met ’n houtpaal doodgeslaan en sy liggaam sowat 8 m ver gesleep voor hy dit aan die brand gesteek het.
Die oorledene was onherkenbaar verbrand, maar kon deur sy familie aan ’n armband uitgeken word.
Isaakz het ’n geweer, skootrekenaar, kosvoorrade en ander items uit die huis gesteel voor hy gevlug het.
Dié items is gestrooi oor die toneel van die ongeluk gevind, sê Shikwambi.
’n Saak van moord, roof met verswarende omstandighede en strafbare manslag word ondersoek.