Vermeende geldwassers kry borgtog

Jacqueline Louw - Landdros Venatius Alweendo het gister in die guns van mnre. Laurentius Julius, Tao Huizhong en Huang Jinrong beslis in hul aansoek om borgtog in ’n saak wat betrekking het op etlike duisende invoertransaksies en buitelandse valuta-oorbetalings.Die drie mans staan tereg op ’n klag dat hulle die minister van finansies onder valse voorwendsels bedrieg het deur voor te gee om goedere in te voer terwyl daar na bewering geen goedere was nie, asook ’n tweede klag van geldwassery deurdat geld vanuit Namibië na die buiteland oorbetaal is wat deur onwettige bedrywighede verkry is.Die staat het borgtog teengestaan vanweë die moontlikheid dat die beskuldigdes met die verdere ondersoeke in die saak asook getuies sou inmeng. Staatsaanklaer Rowan Van Wyk het ook aangevoer dat dit nie in die publieke belang is dat hulle vrygelaat word nie en ook aangevoer dat hulle moontlik op vlug kan slaan en verdere misdrywe pleeg. Die feit dat Namibië nie ’n uitleweringsooreenkoms met China het nie, maak die vlugrisiko van die twee Chinese burgers soveel groter, het die staat aangevoer.Die klagte teen Tao hou verband met beweerde transaksies van US$12.3 miljoen wat deur sy maatskappy, Golden Phoenix, ingedien is en waarvan na bewering net US$300 000 tot US$400 000 verklaar is, wat ’n verskil van minstens US$11.9 miljoen daarstel. Golden Star, die maatskappy waarby Huang na bewering betrokke is, word gekoppel aan transaksies ter waarde van US$2.4 miljoen waarvan slegs US$100 000 aan doeane verklaar is.In die borgtogaansoek is getuienis deur mnr. Roy Waligora, ’n forensiese rekenmeester van die ouditeursfirma KPMG, gelewer tot die effek dat nagenoeg 1 600 buitelandse valuta transaksies met Julius se maatskappy, Extreme Customs Clearing Services (ECCS), verbind word. Hy het verder getuig dat N$3.5 miljard vanaf die begin van 2013 tot aan die einde van 2016 deur ECCS by Nedbank inbetaal is om aan buitelandse maatskappye oorbetaal te word.Alhoewel Tao en Huang gedurende die borgtogaansoek aangevoer het dat hulle slegs werknemers van onderskeidelik Golden Phoenix en Golden Star was, het die hof bevind dat hulle wel die eienaars van hierdie maatskappye was.Alweendo het in sy uitspraak na die Chinese burgerskap van Tao en Huang verwys en gesê dit sou ongrondwetlik wees indien borgtog op grond van etnisiteit of sosioëkonomiese gronde geweier word. Hy het streng borgtogvoorwaades aan die drie aansoekers gestel deur onder meer te gelas dat hul paspoorte by die polisie ingehandig word, foto’s van hulle aan alle grensposte in Namibië voorsien word en dat hulle al drie twee keer per week moet aanmeld by die polisiekantore in die onderskeie distrikte waar hulle woonagtig is.Al drie die beskuldigdes sal onskuldig pleit wanneer die verhoor op 16 Februarie ’n aanvang neem.

Vermeende geldwassers kry borgtog

Kommentaar

Republikein 2026-02-06

Meld asseblief aan om kommentaar te lewer

Vermeende geldwassers kry borgtog

Kommentaar

Republikein 2026-02-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.