Vermeende dronkbestuurder bly in aanhouding

Tanja Bause - Die man wat na bewering die ongeluk veroorsaak het waarin twee jong mans twee weke gelede in Windhoek gesterf het, bly in aanhouding nadat borgtog tydens sy verskyning in die hof geweier is.
Mnr. Quintin du Preez het Vrydag in die landdroshof in Windhoek op klagte van strafbare manslag, roekelose en nalatige bestuur en bestuur onder die invloed van alkohol, verskyn. Borgtog is geweier en hy bly in aanhouding tot 30 Augustus wanneer hy weer om borgtog aansoek sal doen.
Du Preez was op 30 Julie in ’n ongeluk in Auasweg betrokke waarin mnre. Damian Maurico Payne (22) en Liam Ashley September (21) gesterf het. Die ongeluk het naby die Safarihotel plaasgevind.
Die twee oorledenes was in ’n rooi bakkie in ’n suidelike rigting onderweg toe ’n sedanvoertuig dit van agter getref het terwyl ’n grys bakkie in ’n noordelike rigting in aantog was.
Die rooi bakkie het gerol voordat dit teen die aankomende bakkie gebots het. Du Preez het die sedanvoertuig bestuur.