Verkrygingsraad kry nuwe baadjie

Augetto Graig - Die Sentrale Verkrygingsraad van Namibië (CPBN) het Woensdag sy nuwe handelsmerk en slagspreuk, “Verkryging met integriteit”, bekend gestel.Die handelsmerk is ’n mylpaal vir die raad, wat volgens sy raadsvoorsitter, mnr. Patrick Swartz, in April 2017 gevestig is om namens die regering besluite oor tenders van meer as ’n sekere bedrag te neem.“Die CPBN se babafase, wat twee jaar geduur het, was nie maklik nie,” het Swartz gesê.“Een van die hoofuitdagings wat by die raad gespook het, wat die volle uitvoering van sy mandaat betref, was ’n tekort aan menslike hulpbronne. Teen Maart 2018 het die CPBN sowat 13 werknemers gehad wat op ’n kontrakbasis aangestel was. “Ons werksmag het tot 31 werknemers gegroei,” het hy gesê. Swartz het gesê hy glo die verkrygingsraad is nou in staat om dienslewering te verbeter.Die adjunkminister van finansies, mnr. Natangwe Ithete, het gesê die CPBN se voorloper, die nasionale tenderraad, is deur die publiek as ’n onetiese en onbetroubare liggaam beskou. “Ongelukkig het die Sentrale Verkrygingsraad van Namibië hierdie negatiewe reputasie oorgeërf. Dit is hoekom ons hard daaraan moet werk om die publiek se siening te verander, deur die korporatiewe beeld te bestuur en deur ope, proaktiewe kommunikasie met interne én eksterne belanghebbendes,” het Ithete gesê.Die adjunkminister het erken daar is weerstand teen die toepassing van die openbare verkrygingswet, maar sê dit is te verstane. “As mense is ons almal soms bang om dít uit te daag wat ons nie ken nie,” het hy gesê. “Die enigste manier waarop hierdie weerstand te bowe gekom kan word, is om bewustheid van ons mandaat te bevorder en om presies te weet wat belanghebbendes verwag,” het hy gesê.Volgens die CPBN se nuwe bemarkings- en betrokkenheidspesialis, me. Johanna Kambala, het die verkrygingsraad daarin geslaag om verkrygingsplanne van die regering en staatsondernemings wat N$2,48 miljard beloop het in 2017-’18 goed te keur, N$8,5 miljard in 2018-’19 en N$3,29 miljard in 2019-’20.Die verlenging van tydperke, kosteverhogings en variasies het in 2017-’18 N$1,6 miljard beloop, en N$2,74 miljard in 2018-’19, terwyl dit in 2019-’20 tot sowat N$972,5 miljoen gedaal het. Direkte verkrygings van N$461,2 miljoen is in 2017-’18 goedgekeur, N$797,1 miljoen in 2018-’19 en amper N$982,9 miljoen in 2019-’20.Toekennings ter waarde van meer as N$111,3 miljoen is in 2017-’18 goedgekeur, terwyl dit in 2018-’19 tot meer as N$317 miljoen gestyg het, en in 2019-’20 sowat N$551,2 miljoen werd was. Volgens inligting wat Kambala verskaf het, was verkrygings in 2017-’18 sowat N$2,177 miljard in totaal werd, sowat N$3,855 miljard in 2018-’19 en sowat N$2,5 miljard in 2019-’20.Dit sluit die verkryging van onafhanklike kragverskaffers uit. – augetto@republikein.com.na

Verkrygingsraad kry nuwe baadjie

Kommentaar

Republikein 2025-05-15

Meld asseblief aan om kommentaar te lewer

Verkrygingsraad kry nuwe baadjie

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie