Verkleurmannetjies fnuik die dood
Die Swakopmund-slangpark hoop dié merkwaardige verhaal sal meer besoekers lok, aangesien hulle weens die Covid-19-pandemie sukkel om kop bo water te hou.
Erwin Leuschner - Ses Namakwa-verkleurmannetjies het na agt maande in ‘n broeikas by die Swakopmund-slangpark uitgebroei. Dít nadat die eiers uit ‘n dooie ma-verkleurmannetjie gered is.
Hulle is piepklein en effens onvas op hulle voete, maar het reeds vurige “persoonlikhede”. Die klein reptiele se storie is buitengewoon.
Volgens die eienaar van die slangpark, mnr. Stretch Combrink, het ‘n inwoner van Swakopmund in September verlede jaar op die volwasse verkleurmannetjie in die woestyn afgekom en na die park gebring. Die verkleurmannetjie was nie in ‘n goeie toestand nie.
Combrink het die reptiel vir me. Chantelle Bosch, ‘n plaaslike toergids, gegee. Sy versorg reeds jare lank beseerde verkleurmannetjies.
“Die ma is na ‘n paar dae dood,” sê Bosch.
Bosch wou eers die dooie reptiel terug na die woestyn neem, maar het besluit om eerder ‘n outopsie uit te voer.
Die verkleurmannetjie was toe reeds drie dae dood. Sy het nie net op lewende ronde wurms in die reptiel afgekom nie, maar ook op nege onderontwikkelde eiers.
Sy was aanvanklik nie seker of die eiers nog lewensvatbaar was nie, aangesien die ma reeds dae lank dood was. Die eiers is in ‘n broeikas by die slangpark geplaas. Wonderbaarlik het sewe van hulle verder ontwikkel en agt maande later het ses verkleurmannetjies uitgebroei.
“Ons Amerikaanse kollegas het ons ingelig dit is uiters skaars om lewensvatbare eiers van ‘n dooie verkleurmannetjie te kry,” het Combrink gesê.
Die klein reptiele het skaars twee gram geweeg nadat hulle uitgebroei het. Hulle is nou ‘n week oud en ontwikkel goed.
“Sodra hulle groot genoeg is sal ons hulle weer in die woestyn vrylaat,” sê dié slangkenner, wat die kleintjies die “wonderkoppeling” gedoop het.
Namakwa-verkleurmannetjies is uniek en vorm deel van die sogenaamde “Klein Vyf”. Hulle is van die vinnigste verkleurmannetjies en het gewoonlik ‘n redelike donker kleur op koel oggende. Sodra die dag begin warm word, word hulle ‘n ligter kleur om koel te bly.
“Daar is nie baie oor die verkleurmannetjies bekend nie,” sê die mede-eienaar van die slangpark, me. Angela Curtis.
“Ons weet nie eens hoe oud hulle word nie.”
Die Swakopmund-slangpark is die enigste openbare park van sy soort in Namibië. Hulle huisves verskillende slangspesies, sowel as ander reptiele, insekte, spinnekoppe en skerpioene.
“Ons het vir twee maande geen inkomste gehad nie weens die coronakrisis,” het Combrink gesê.
Hy hoop die unieke verkleurmannetjies sal meer besoekers lok. “Andersins weet ons nie hoe ons kop bo water gaan hou nie,” voeg hy by.
- [email protected]
Hulle is piepklein en effens onvas op hulle voete, maar het reeds vurige “persoonlikhede”. Die klein reptiele se storie is buitengewoon.
Volgens die eienaar van die slangpark, mnr. Stretch Combrink, het ‘n inwoner van Swakopmund in September verlede jaar op die volwasse verkleurmannetjie in die woestyn afgekom en na die park gebring. Die verkleurmannetjie was nie in ‘n goeie toestand nie.
Combrink het die reptiel vir me. Chantelle Bosch, ‘n plaaslike toergids, gegee. Sy versorg reeds jare lank beseerde verkleurmannetjies.
“Die ma is na ‘n paar dae dood,” sê Bosch.
Bosch wou eers die dooie reptiel terug na die woestyn neem, maar het besluit om eerder ‘n outopsie uit te voer.
Die verkleurmannetjie was toe reeds drie dae dood. Sy het nie net op lewende ronde wurms in die reptiel afgekom nie, maar ook op nege onderontwikkelde eiers.
Sy was aanvanklik nie seker of die eiers nog lewensvatbaar was nie, aangesien die ma reeds dae lank dood was. Die eiers is in ‘n broeikas by die slangpark geplaas. Wonderbaarlik het sewe van hulle verder ontwikkel en agt maande later het ses verkleurmannetjies uitgebroei.
“Ons Amerikaanse kollegas het ons ingelig dit is uiters skaars om lewensvatbare eiers van ‘n dooie verkleurmannetjie te kry,” het Combrink gesê.
Die klein reptiele het skaars twee gram geweeg nadat hulle uitgebroei het. Hulle is nou ‘n week oud en ontwikkel goed.
“Sodra hulle groot genoeg is sal ons hulle weer in die woestyn vrylaat,” sê dié slangkenner, wat die kleintjies die “wonderkoppeling” gedoop het.
Namakwa-verkleurmannetjies is uniek en vorm deel van die sogenaamde “Klein Vyf”. Hulle is van die vinnigste verkleurmannetjies en het gewoonlik ‘n redelike donker kleur op koel oggende. Sodra die dag begin warm word, word hulle ‘n ligter kleur om koel te bly.
“Daar is nie baie oor die verkleurmannetjies bekend nie,” sê die mede-eienaar van die slangpark, me. Angela Curtis.
“Ons weet nie eens hoe oud hulle word nie.”
Die Swakopmund-slangpark is die enigste openbare park van sy soort in Namibië. Hulle huisves verskillende slangspesies, sowel as ander reptiele, insekte, spinnekoppe en skerpioene.
“Ons het vir twee maande geen inkomste gehad nie weens die coronakrisis,” het Combrink gesê.
Hy hoop die unieke verkleurmannetjies sal meer besoekers lok. “Andersins weet ons nie hoe ons kop bo water gaan hou nie,” voeg hy by.
- [email protected]
Kommentaar
Republikein
Geen kommentaar is op hierdie artikel gelaat nie