Verdagte in Botma-moordsaak kry borgtog

Ronelle Rademeyer - Die 37-jarige mnr. Johannes Christiaan, een van die drie mans wat daarvan beskuldig word dat hulle mnr. Giel Botma (79) en sy 80-jarige vrou, Sarie, op 2 Februarie verlede jaar op hul plaas by Koës vermoor het, is op borgtog vrygelaat.Landdros Melissa Mungunda het gister in die landdroshof op Keetmanshoop in Christiaan se guns beslis en gelas dat hy op borgtog van N$10 000 vrygelaat word.Hy het op 11 Desember verlede jaar ’n formele aansoek om borgtog ingedien, wat deur die staatsaanklaer, mnr. Lewis Chigunwe, teengestaan is.Sy borgvoorwaardes bepaal hy moet sy reisdokumente inhandig en hy mag Keetmanshoop nie sonder toestemming van die polisie verlaat nie.Nagenoeg 350 boere en ander inwoners van die Suide het verlede jaar na dié landdroshof opgeruk toe Christiaan en sy medebeskuldigdes, mnre. Julius Frederick “Lemmie” Arndt (41) en Andries Afrikaner (38), hul eerste verskyning gemaak het.Hul teenwoordigheid was ’n stille protes teen die moontlike toekenning van borgtog aan die mans.Die beskuldigdes is onder streng polisiebewaking by die hof aangebring waar die klagte aan hulle gestel is. Benewens die twee klagte van moord, staan die mans ook tereg op klagte van huisbraak met die opset om te roof en roof, asook die diefstal van die egpaar se bakkie en ’n vuurwapen uit hul kluis.Arndt staar benewens hierdie klagte ’n bykomende klag van huisbraak met die opset om te steel en diefstal in die gesig.Hy het na bewering die nag vóór die moorde ook by die Botmas ingebreek en sowat N$500 uit die kantoor op die plaas Lindeshof gesteel. Dié plaas is sowat 10 km buite Koës en grens aan die dorpsgronde.Die uitgebreide soektog na die drie beskuldigdes is as ’n suksesverhaal van goeie samewerking tussen geörganiseerde landbou se strukture, soos boereverenigings en misdaadvoorkomingsforums, en die polisie beskou.Arndt, wat voorheen tronkstraf vir motordiefstal uitgedien het, is die volgende dag sowat 300 km van die moordtoneel op Aranos aangekeer. Hy het na bewering met die Botmas se bakkie en die moordwapen, ’n .22-geweer, daarheen gevlug. Afrikaner en Christiaan is die aand by Koës in hegtenis geneem. – Eie berig en Nampa

Verdagte in Botma-moordsaak kry borgtog

Kommentaar

Republikein 2025-09-18

Meld asseblief aan om kommentaar te lewer

Verdagte in Botma-moordsaak kry borgtog

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie