Verbod op invoere weens voëlgriep

Elvira Hattingh - Die ministerie van landbou, water en bosbou het gister 'n verbod aangekondig op die invoer van alle lewende voëls, pluimvee, asook pluimveeprodukte van lande af wat deur die hoogs aansteeklike voëlgriep (HPAI) geraak word.Die kennisgewing is uitgereik kort nadat dit bekend geword het dat die virus in sekere dele van Europa, Asië en Afrika onder pluimvee uitgebreek het. Van die lande wat geaffekteer is, sluit in Frankryk, Duitsland, Hongarye, Nederland, Pole, Swede, Oekraïne, Rusland, Denemarke, Engeland, Italië, Griekeland, Indië en Nigerië. Alle invoerpermitte na Namibië is dus weer vir dié lande gekanselleer. Volgens die Wêreldorganisasie vir Dieregesondheid (OIE) is die inkubasietyperk van die siekte 21 dae.Voëlgriep is 'n oordraagbare siekte onder voëls wat deur die A-lyn van die griepvirus veroorsaak word. Alle voëls is vatbaar vir die infeksie, hoewel sommige meer weerstandig daarteen is as ander. HPAI word gekenmerk daaraan dat voëls skielik ernstig siek raak. Dit lei tot 'n vinnige dood met 'n sterftesyfer van om en by 100%. Algemene kliniese tekens sluit die volgende in: die voël se kop en kam swel en verkleur pers, die voete swel en vertoon rooi, interne organe en spiere bloei, groen diarree kom voor, die voël draai sy nek, en verlamming kom in die bene en vlerke voor. Voëlgriep word ook veroorsaak deur die H5N1- en H7N9-subtipes en kan aan mense oorgedra word. Mense kan deur hul oë, neus en mond met die virus in aanraking kom as hulle met siek voëls werk, die vleis van siek voëls eet of met siek voëls se spoeg of ontlasting werk. KNOPVELSIEKTE VERSPREIIntussen het die ministerie ook bekend gemaak dat knopvelsiekte nou by Okangeama in die Otjituuo-gebied uitgebreek het en dat sewe beeste van vyf gesinne tot dusver geraak is.Die gebied is binne die Okakarara-kiesafdeling geleë. Die direktoraat van veeartsenydienste het gevolglik die beweging van beeste na nabygeleë nedersettings soos Okomuparara, Okomita, Omingerenjeu, Ondjiripumua, Omaundjiro, Elandspan, Ozonjune, Otjiwamapeta, Okahumba en Okozombo tot verdere kennisgewing verbied. Terselfdertyd begin veeartsenydienste met aktiewe ondersoeke by Otjituuo om die omvang van die siekte te bepaal en padblokkades word opgestel om seker te maak gehoor word aan die vereistes gegee. Die ministerie het boere in die omgewing en in die res van die land aangeraai om hul vee teen die siekte te ent. Verder moet die vermoedelike uitbreking van die siekte by die naaste staatsveearts aangemeld word. Boere kan hul vee sulfonamides en antibiotika gee om sekondêre bakteriese infeksie te voorkom en diere te help om die siekte te oorkom.

Verbod op invoere weens voëlgriep

Kommentaar

Republikein 2025-08-11

Meld asseblief aan om kommentaar te lewer

Verbod op invoere weens voëlgriep

Kommentaar

Republikein 2025-08-11

Meld asseblief aan om kommentaar te lewer

MELD AAN

Advertensie