Verblyfreg vir 778 Gobabis-inwoners

Elvira HattinghNog 778 Gobabis-inwoners het verblyfreg op gedienste grond in die dorpsomgewing van Gobabis ontvang, danksy die regering se buigsame grondbesitstelsel (FLTS)-projek.Me. Anna Shiweda, adjunkminister van landbou, water en grondhervorming, het tydens die oorhandiging van die verblyfregtitels laas Vrydag aan huurreghouers gesê Gobabis se munisipale raad, onder leierskap van hul voormalige burgemeester, mnr. Liberius Kalili, het grond gratis vir die projek beskikbaar gestel. Hiervoor is nege buigsame grondbesitskemas begin. “Ek is in kennis gestel dat in totaal 1 110 residensiële erwe op dié grond geskep en deur die raad beskikbaar gestel is,” het Shiweda gesê. Sy het gesê die munisipaliteit het reeds al die erwe gediens en daar is reeds paaie en toegang tot water en riooldienste.Tydens die geleentheid by die Freedom Square-nedersetting op Gobabis het Shiweda gesê die strewe met die FLTS-projek is om 'n einde aan informele nedersettings in dorpe te bring.Sy sê om die oorhandiging van die verblyfregtitels moontlik te maak, het die regering sowat N$1,2 miljoen op haalbaarheidstudies, ontwikkelings- en uitlegplanne, registrasies van blokerwe in die titelaktekantoor asook opleiding van munisipale amptenare bestee.Shiweda het verduidelik die stelsel is uniek omdat die registrasie van die titels in die titelaktekantoor gratis deur 'n regeringsamptenaar gedoen word, anders as eiendomsregregistrasies wat teen 'n koste deur 'n aktebesorger gedoen word. Sy sê in so 'n geval sou die registrasie van al dié titels tussen N$7 200 en N$12 900 per erf gekos het – wat neerkom op 'n totale bedrag van bykans N$5,7 miljoen.“Dié bedrag is dus nou deur die regering gedek,” het sy gesê. REGTESy het gesê die verblyfregtitels gee aan huurreghouers, wat 'n kleiner inkomste verdien, die geleentheid om huise van hul keuse op die grond te bou.Boonop geniet hulle verblyfsekuriteit en kan die verblyfregtitels gebruik word om toegang tot finansiële dienste by banke te kry. Hulle kan hul eiendomsreg selfs oordra, byvoorbeeld na die volgende geslag.“Buiten vir Gobabis, word die projek tans ook in Windhoek toegepas. Die landmeter is besig met grondopmetings van erwe en strate in Onyika en Okuryangava. “Ons beskou die FLTS-projek as 'n oplossing om stedelike grond te verskaf. Daarom is enige een wat kla oor 'n gebrek aan grond of diegene wat grond gryp, skuldig daaraan dat hulle nie met ons plaaslike owerhede in gesprek tree om deel van die projek te word nie,” het sy gesê. Sy sê die projek word tans ook op Outapi, Mariental en Lüderitz van stapel gestuur en dat huurreghouers op dié dorpe nog vanjaar of vroeg in volgende jaar aangewys sal word. Sy het die Duitse regering bedank, wat beide die tegniese en geldelike steun deur die Deutsche Gesellschaft für Internationale Zusammenarbeit (GIZ) vir die projek gebied het. Duitsland se ambassadeur in Namibië, mnr. Herbert Beck, het by die geleentheid gesê na raming woon tans meer mense in dorpsgebiede as landelike gebiede. Hy meen juis om die rede is behoorlike en bekostigbare behuising noodsaaklik.– elvira@republikein.com.na

Verblyfreg vir 778 Gobabis-inwoners

Kommentaar

Republikein 2026-08-26

Meld asseblief aan om kommentaar te lewer

Verblyfreg vir 778 Gobabis-inwoners

Kommentaar

Republikein 2026-08-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.