Veilingshuise verbied renosterhoringverkope

Francoise Steynberg - 'n Vierde groot Chinese veilingshuis, China Guardian, het alle verkope van renosterhoringartefakte, wat as 'n statussimbool in China geag word, gekanselleer. Dit volg nadat die veilinghuise Bonhams en Sotheby's hul renosterhoringverkope in Hongkong gekanselleer het en gesê het hulle gaan geen veilings meer in die toekoms hou nie. Die Britse veilingshuis Christie's het reeds renosterhoringverkope verbied. Poly Auction is die enigste van vyf groot Chinese veilingshuise wat nog nie 'n verbod op die verkoop van renosterhoringartefakte geplaas het nie. China Guardian se hoofkwartier is in die Chinese hoofstad Beijing geleë, maar het ook kantore in twee groot Chinese stede, Sjanghai en Guangzhou, asook in Hongkong, Taiwan, Japan en Amerika. China Guardian se kantoor in Hongkong het in 'n verklaring gesê dit "is onderhewig aan en ondersteun ten volle die internasionale wette rakende die beskerming van die renoster". Hulle het bevestig "geen renosterhoringartefakte sal meer in die toekoms te koop wees nie". Sotheby's het volgens China South Post ná druk van bewaringsgroepe aangekondig dat dit drie renosterhoringlotte gekanselleer het van 'n veiling wat verlede Donderdag in Hongkong sou plaasvind. Mnr. Nicholas Chow, die voorsitter van Sotheby's in Asië, asook die internasionale hoof en voorsitter van Chinese kuns, het gesê dit wil die verkope van renosterhoringartefakte in die toekoms stop. “Sotheby's betreur enige onwettige stropery en handel van bedreigde wild, en ondersteun bewaringspogings van die wêreldgemeenskap,” sê dié veilingshuis wat in Amerika gesetel is. “Terwyl die maatskappy nog altyd streng aan die internasionale wette voldoen het en slegs verifieerbare historiese stukke met Cites-lisensies te koop aangebied het, bevestig Sotheby's dat die drie renosterhoringverwante lotte van die Chinese kunsveiling in Hongkong verlede Donderdag met die toestemming van afslaers gekanselleer is." Dit volg 'n week nadat Bonhams sy lot van 21 versamelings van renosterhoringkerfwerk in Hongkong wat verlede Dinsdag moes plaasvind, gekanselleer het ná kritiek van wêreldwye omgewingsgroepe. Dié Britse veilingshuis in private besit, het ook bevestig dat dit geen renosterhoringitems in die toekoms gaan verkoop nie. Christie's het reeds 'n beleid om nie enige items te verkoop wat renosterhoring bevat nie. Ingevolge Hongkongse wetgewing moet die invoer en heruitvoer van renosterhoring of -produkte wat bestaan het voordat die Cites-konvensie in Julie 1975 bekragtig is, met dokumentêre bewyse, soos 'n sertifikaat uitgereik deur die uitvoerland, ondersteun word. Die verifiëring van die egtheid van renosterhoringstukke vereis duur en lang koolstofanalise. Omgewingsgroepe meen handel in renosterhoring sal die toekomstige aanvraag na antieke ware van renosterhoring, asook vir vals renosterhoringprodukte, stimuleer. Omgewingsgroepe sê dit sal dus renosterstropery bevorder wat moontlik kan lei tot die uitwissing van 'n bedriegde spesie. Renosterhoring word meestal in tradisionele Chinese medisyne gebruik, alhoewel daar geen wetenskaplike bewyse is dat dit enige medisinale voordele inhou nie. Renosterhoring word ook in kerfwerk gebruik wat as 'n statussimbool in China en Asië geag word. Volgens die ministerie van die omgewing en toerisme is al 55 renosters vanjaar in Namibië gestroop. - Bykomende bron China South Post

Veilingshuise verbied renosterhoringverkope

Kommentaar

Republikein 2025-06-17

Meld asseblief aan om kommentaar te lewer

Veilingshuise verbied renosterhoringverkope

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie