Vegvliegtuig val Libiese lughawe aan

’n Vegvliegtuig het Tripoli se enigste funksionerende lughawe Maandag aangeval soos wat oostelike magte, wat na die Libiese hoofstad beweeg, internasionale oproepe vir ’n wapenstilstand ignoreer in die jongste van ’n oorlogsiklus sedert Moeammar Ghaddafi se afsetting in 2011.Ongevalle neem toe in gevegte wat dreig om olievoorrade en die verskaffing van brandstof aan Europa te ontwrig, asook die Verenigde Nasies (VN) se planne vir ’n verkiesing ten einde wedywering tussen parallelle administrasies in die land se ooste en weste te beëindig.Die ooste se Libiese Nasionale Leër (LNA) van Khalifa Haftar, ’n voormalige generaal in Ghaddafi se weermag, sê 19 van sy soldate is die laaste tyd dood soos wat hulle nader aan die internasionaal erkende regering in Tripoli kom.’n Woordvoerder van die ministerie van gesondheid in Tripoli sê 25 mense is in gevegte in die suide van die hoofstad dood, onder wie soldate en burgerlikes, en 80 is gewond.Die Matiga-lughawe in die oostelike woongebied is gebombardeer en gesluit, het die owerhede gesê. Dit beteken die Misrata-lughawe 200 km oos langs die kus, is nou die naaste lughawe vir Tripoli-inwoners.Haftar se LNA, wat die oostelike administrasie van Benghazi steun, het die olieryke suide van Libië vanjaar beset voordat hulle vinnig deur die hoofsaaklik onbewoonde woestynstreke na Tripoli beweeg het.Dit is egter ’n groter uitdaging om die hoofstad oor te neem. Die LNA het lugaanvalle in die suide van die stad uitgevoer met die doel om met ’n pad langs ’n ongebruikte internasionale lughawe te vorder.VN-BEMIDDELDE OOREENKOMSOoggetuies het Maandagmiddag gesê die LNA het beheer oor die ou lughawe verloor en het uit hul posisies op die lughawepad onttrek. Magte verbonde aan die Tripoli-administrasie is binne die lughawe gesien, terwyl skermutselings met die oostelike magte suid van die lughawe gewoed het, het ’n Reuters-verslaggewer en inwoners op die toneel gesê.Sondagaand het LNA-magte van die lughawe af tot sowat 1 km van die middestad af gekom voordat hulle teruggetrek het, het inwoners gesê.Die regering van premier Fayez al-Serraj (59) wil die LNA keer met die hulp van geallieerde gewapende groepe wat hulle van Mistrata af na Tripoli gehaas het in voertuie met gemonteerde masjiengewere. Masjiengeweervuur kon vanuit die hoofstad na die suide gehoor word.Serraj is sedert 2016 in beheer van Tripoli as deel van ’n VN-bemiddelde ooreenkoms wat deur Haftar geboikot word.Haftar sien homself as ’n vyand van ekstremisme, maar sy teenstanders sien hom as die nuwe diktator in die vorm van Ghaddafi, wie se heerskappy van vier dekades gekenmerk is deur marteling, verdwynings en sluipmoorde.Luidens ’n verslag van die VN se Kantoor vir Menseregte het 2 800 mense reeds sedert 4 April voor die gevegte suid van Tripoli gevlug terwyl talle vasgekeer en van nooddienste afgesny is.“Die vinnige ontplooiing van magte kan potensieel lei tot noemenswaardige bevolkingsontworteling,” lui die verslag. Noodlenigingsagentskappe op die grond het wel genoeg noodmediese voorraad om 210 000 mense en 900 soorte beserings vir drie maande te behandel.Die VN het in ’n verklaring steeds gevra vir ’n tydelike humanitêre wapenstilstand om voorsiening te maak vir nooddienste en die vrywillige deurgang van burgerlikes, onder wie die gewondes, uit konflikgebiede. – Netwerk24/Reuters

Vegvliegtuig val Libiese lughawe aan

Kommentaar

Republikein 2025-05-01

Meld asseblief aan om kommentaar te lewer

Vegvliegtuig val Libiese lughawe aan

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie