Veggees vereis voor WHS jaar onoorwonne sluit

Andrew Poolman - Al kry dit nie aldag erkenning nie, is die talent van Namibië se netbal op skolevlak kerngesond en die mededingende vlak van laas naweek se Coca-Cola nasionale ligafinale is presies wat 'n mens wil hê.Só sê Sunette Burden, afrigter van Auas Motors Windhoek Hoërskool se eerste span wat die o.19-liga met 'n enkele punt in 'n dramatiese eindstryd teen PSG Windhoek Gimnasium gewen het.Met twee minute oor was die ligbloues nog met drie punte agter, maar volgens Burden het die spelers besondere volwassenheid gewys om hul fokus te behou en met 25-24 die knoop deur te haak.“Om so 'n agterstand een doel op 'n slag uit te wis, is nie maklik nie. Onder geweldige druk met soveel mense rondom die baan wat skree, het hulle in die laaste sekondes kopgehou en karakter gewys,” sê sy.Burden is vol lof vir die harde werk wat haar spelers ingesteek het om hul ganse seisoen onoorwonne af te sluit. Volgens sommige waarnemers het geen WHS-netbalspan in die laaste 15 jaar dit reggekry om in een seisoen elke wedstryd te wen nie.Dit het vroeg vanjaar 'n toer na die Wes-Kaap ingesluit waar hulle onder meer die Meisieskool Bloemhof, Hoërskool Stellenbosch en Hoërskool Bellville geklop het.Nadat die WHS-span 'n week gelede die Bank Windhoek Superliga (waaraan net die land se topskole in elke ouderdomsgroep op uitnodiging deelneem) se o.19-eindstryd met vyf punte teen Windhoek Gimnasium gewen het, het dieselfde twee spanne mekaar Saterdag weer in die nasionale finaal ontmoet.Gimnasium moes reeds in die vorige vier ontmoetings vanjaar tweede viool speel – insluitend 'n pynlike loesing in die interhoër op hul tuisbaan met 45-25.Hierdie keer het afrigter Imelda Basson se span in rooi en swart egter gewys dat hulle intussen hul huiswerk gedoen het en veral die finale afronding van die doelgooiers was veel meer akkuraat. Die Gimmies was ook deurgaans gevaarlik op die teenaanval, met hul spelers sonder die bal wat flink in die spasies beweeg het om die volgende aangee te vat.Burden sê op sosiale media was dit bevredigend om te sien dat mense die spelers vir hul goeie spel en prestasies geprys het. “Min mense het ons in die begin van die jaar 'n kans gegee. Vir 'n staatskool wat dikwels met die minimum moet klaarkom, is dit goeie beloning vir die harde werk wat die spelers ingesit het om deurlopend fenomenale netbal te speel en hul droom 'n werklikheid te maak. “Ons weet mos dat netbal maar altyd onder die radar beweeg en dat al die aandag gewoonlik op rugby is.”Beide WHS en Gimnasium – die twee toonaangewende o.19-spanne in 2017 – sal volgende jaar vyf eerstespanspelers moet vervang wat vanjaar in matriek is. “Dit was rêrig twee oulike spanne wat vanjaar baie uit hul onderlinge kompetisie geleer het. Ek is trots op altwee spanne wat so 'n opwindende finaal gelewer het.”As 'n ervare gewese nasionale speler wat ook vir drie jaar die senior nasionale span afgerig het, is Burden positief oor die toekoms van Namibiese netbal. Sedert verlede jaar is sy ook vir drie seisoene aangestel om die Namibiese o.19-span vir die Streek 5-toernooie voor te berei. Die tweejaarlikse toernooi hervat volgende jaar.“Ons hou dus reeds van o.15-vlak af ons oë oop om spelers vir die Namibiese span te identifiseer.“Dit was jammer dat vanjaar geen o.19-proewe gespeel is nie omdat daar nie geld was nie, maar verskeie mense in netbal werk hard om te verseker dat die regte trappe vir spelers na die senior nasionale span bestaan. “Dit is belangrik dat spelers sodra hulle skool verlaat, nie ophou netbal speel nie en dat daar genoeg aktiewe klubs is om vir diegene opsies te gee wat nie in die buiteland verder gaan studeer nie.“Die borgskap van Debmarine aan Netbal Namibië vir die volgende drie jaar skep ook geleenthede om dinge vorentoe te vat.” UITSLAEMet spanne in die finaal van elke ouderdomsgroep het Windhoek Gimnasium gewys dat hy 'n prominente figuur in skolenetbal is. Gimmies het beide die laerskool-afdelings ingepalm en hul o.15's het ook die trofee omhoog gehou.Die onderskeie ligas het soos volg geëindig:O.12-finaal: Windhoek Gimnasium klop Pro-Ed Akademie met 18-14. Bronsmedalje: Windhoek Afrikaanse Privaatskool.O.13-finaal: Windhoek Gimnasium klop Windhoek Afrikaanse Privaatskool met 28-14. Bronsmedalje: Primêre Skool Wilhelm Nortier.O.15-finaal: Windhoek Gimnasium klop Elnatan met 23-15. Bronsmedalje: Windhoek Afrikaanse Privaatskool.O.17-finaal: Walvisbaai Privaat Hoërskool klop Windhoek Gimnasium met 35-31. Bronsmedalje: Tsumeb Gimnasium.O.19-finaal: WHS klop Windhoek Gimnasium met 25-24. Bronsmedalje: Elnatan.

Veggees vereis voor WHS jaar onoorwonne sluit

Kommentaar

Republikein 2026-11-03

Meld asseblief aan om kommentaar te lewer

Veggees vereis voor WHS jaar onoorwonne sluit

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.