Vee terug by Bodenhausen

Elvira HattinghDie eienaar van die Bodenhausen-kleinhoewe, wat daarvan beskuldig word dat hy sy vee en perde erg verwaarloos het, se diere is op streng voorwaardes aan hom terugbesorg. Dít volg nadat die Dierebeskermingsvereniging (DBV) en mnr. Sinclair Aspara op 21 Februarie ooreengekom het hy kan sy vee terugkry, mits hy kan bewys hy het verskeie vereistes nagekom wat met hul welstand verband hou. Aspara het beloof om behoorlike kos, water en mediese sorg aan die diere te gee en dat hy bewys hiervan sal lewer voordat die vee aan hom oorhandig word. Die DBV monitor die situasie steeds, en as dit blyk daar word nie na behore na die diere omgesien nie, of dat hulle mishandel word, sal die vee weer afgeneem word. Dit volg nadat die hoërhof op 30 Januarie 'n tussentydse bevel aan die DBV toegestaan het vir die beslaglegging op 61 erg verwaarloosde en mishandelde beeste, asook vier perde. Die DBV sê hulle huldig die standpunt dat dit beter is om die eienaar op te voed oor die vereistes om behoorlik na sy vee om te sien en om die eienaar te “rehabiliteer” om sy vee met deernis en waardigheid te hanteer. “Eers as dié pogings onsuksesvol of onwaarskynlik blyk te wees, sal meer drastiese optrede oorweeg word,” het Annie's Animal Legal Fund, Namibië se DBV en die Windhoekse DBV in 'n gesamentlike nuusverklaring geskryf. Die DBV voeg by dat vee volgens Namibiese wetgewing as “eiendom” beskou word en dat 'n eienaar ingevolge die wet met sy eiendom kan maak soos hy goed dink. “'n Mens kan egter uit die uitreiking van die tussentydse bevel aflei die hof beskou diere as verhewe bo blote eiendom en dat die welsyn van diere 'n belangrike oorweging vir die hof is.” GESKIEDENISDie DBV se beslaglegging op die vee volg nadat hulle in Februarie verlede jaar reeds 'n klagte oor Aspara se hantering van sy vee ontvang het en besoek aan sy eiendom afgelê het. Tydens die besoek is uitgeteerde vee aangetref – sonder toegang tot water of skuiling. “Sedertdien het die DBV verskeie kere met die veewagters in verbinding getree om behoorlike kos en sorg aan die diere te verskaf. “In Desember verlede jaar het die eienaar die vee toegelaat om op die padreserwes van 'n openbare pad te wei, wat tot een of meer motorongelukke gelei het,” is in die nuusverklaring geskryf. Die DBV het toe 'n finale waarskuwing aan die eienaar gerig. Ná die omstandighede steeds nie verbeter het nie, het hulle met behulp van Annie's Animal Legal Fund 'n dringende aansoek voor die hof gebring. Die aansoek is bykans 'n jaar later gebring nadat die DBV strafregtelike klagte van dieremishandeling teen die eienaar by die polisie aanhangig gemaak het. Die DBV sê tot dusver het die polisie niemand in verband met die saak in hegtenis geneem nie. Hulle sê alle gevalle van dieremishandeling word betreur, maar hierdie geval het uitgestaan omdat 'n klomp diere betrokke was, die graad van verwaarlosing baie ernstig was en die feit dat die eienaar die diere toegelaat het om op die reserwes van 'n openbare pad te wei, en menselewens in gevaar gestel het. “Boonop het die eienaar die dooie diere slegs met nuwes vervang, waarna hulle óók verwaarloos is,” lui die verklaring.Die DBV sê sedert hulle die eerste klagte oor die vee ontvang het, totdat die dringende aansoek in die hof gebring is, het hulle verskeie kere kontak met beide die eienaars asook die veewagters gehad in die hoop om die vee se omstandighede te verbeter. “Desondanks is die diere steeds voortdurend verwaarloos,” lui die verklaring.

Vee terug by Bodenhausen

Kommentaar

Republikein 2025-05-07

Meld asseblief aan om kommentaar te lewer

Vee terug by Bodenhausen

Kommentaar

Republikein 2025-05-07

Meld asseblief aan om kommentaar te lewer

MELD AAN

Advertensie