Van steggie na stam

Yochanaan CoetzeeTydens Noorderlig se laaste besoek aan die Ondundu Kwekery van mnr. Fillemon Hanadaab (52) en sy vrou Jenty (49) op Tsumeb, was die kwekery nog op kleinskaal, met dringende behoeftes aan die nodige materiaal en toerusting. Maar danksy Hanadaab se groen hande en die pragtige bome en plante wat hy vir spotgoedkoop pryse verskaf, is sy kliënte gelukkig en toon die kwekery baie groei.“Die doel is nie juis om baie geld uit die kwekery te maak nie. Ons geniet dit baie en dit is 'n besonderse gevoel as jy verby 'n oudkliënt se huis loop en jy sien hoe mooi die boom wat jy tien jaar gelede aan hom verkoop het, groei,” sê hy.“Sommige van die plante wat jy op die dorp sien is so oud soos my kliënte se kinders en hulle besoek my steeds. Een van die dae sal hul kinders bome by my kom koop vir hulle eie huise,” sê hy laggend.Na hy tuinbou vir meer as 18 jaar by Hoërskool Francis Carlton onder leiding van wyle mnr. Gerhard Stieler geleer en bemeester het, wou hy ook sy eie handewerk beproef deur sy eie kwekery te begin.“Dis baie meer as net 'n stokperdjie,'” sê hy.“Daar is baie werk wat in die kwekery ingesit moet word en as dit nie vir my vrou en kinders was wat hulle bydrae gelewer het nie, sou ons nie kon wees waar ons vandag is nie,” sê hy.Sy kwekery kon danksy Dundee Precious Metals se gawe borgskap van N$20 000 se boumateriaal uitbrei en seile oor kry en is nou in staat om meer natuurlike produkte te kweek van beter gehalte.“Dit het so groot verskil gemaak vir ons produksie en die weerstandsvermoë van die plante. Die gesnoeide steggies waarmee ek begin het, het dit vir my moontlik gemaak om aan my kinders 'n goeie opvoeding te kan gee. Met die hupstoot van Dundee Precious Metals se borgskap is ons nou in staat om hulle eendag universiteit toe te stuur,” sê hy.Met besonderse plante, 'n onbaatsugtige benadering tot tuinbou en pryse so laag as N$60 vir 'n palmboom, lyk dit asof niks in Ondundu Kwekery se pad sal staan nie. Besoek hulle gerus in die omgewing agter Tsumeb Gimnasium of vra net vir die inwoners van Tsumeb vir ou Fillemon “die groen-vinger”.

Van steggie na stam

Kommentaar

Republikein 2025-05-08

Meld asseblief aan om kommentaar te lewer

Van steggie na stam

Kommentaar

Republikein 2025-05-08

Meld asseblief aan om kommentaar te lewer

MELD AAN

Advertensie