Van skroot tot spogvoertuie deur bekwame hande

Mariana Balt Vir ’n gewone besoeker mag die werf van BB Trucks & Spares in Gobabis met die eerste oogopslag redelik chaoties voorkom. Hier lê immers rye en rye groot vragmotor komponente oor ’n groot gebied versprei, terwyl meer vragmotorwrakke, sommige erg opgefrommel in ongelukke, elders ook in ’n ry geparkeer staan.Tog is dit die netheid en orde binne die oënskynlike chaos wat ’n mens ’n tweede keer laat kyk en tot die besef bring dat hierdie alles behalwe ’n slordige skrootwerf is. Gaan ’n mens dan die werkswinkels en veral stoorkamers binne, waar onderdele netjies in vakkies en rakke opgestapel lê, snap ’n mens dat hier presies en met deeglikheid gewerk word en die personeel presies weet wat om met al die onderdele te maak.Dis voorwaar die geval, sê eienaar en meestervakman Gerald Bekker. Hy verduidelik trots dat sy werkswinkel reeds so gespesialiseerd ontwikkel is dat hulle enige herstelwerk aan Mercedes-vragmotors kan doen en self al die onderdele daarvoor kan voorsien. Hulle kan sommer ’n hele vragmotor van die grond af opbou. In sy werkswinkel hou hy altyd een of twee werksruimtes oop vir die opbou van ’n “nuwe” vragmotor, aangesien dít vir hom groot uitdaging inhou.Een so ’n vragmotor staan juis om die hoek geparkeer. Sterker as die spreekwoordelike bees met sy 8x8-trekkrag en blinknuut, van die netjiese swart buffers, die voorste dubbel-as, die versterkte onderstel, die bak wat wettiglik 20 ton kan dra, tot die byna luukse kajuit met nuwe stoffering en instrumentepaneel. Wanneer Gerald vertel dat die oorspronklike vragmotor, waarvan hy slegs stukke van die onderstel kon hergebruik, in ’n trompopbotsing naby Grootfontein onherstelbaar beskadig is, besef ’n mens hoeveel vakmanskap, kennis en geduld hier ingespan is.Dit is ook die vrug van deeglike opleiding, want Gerald vertel dat hy altyd sorg dat sy werktuigkundiges die beste opleiding kry wat beskikbaar is. Daarom dat hy ook in spesialisasie glo en, hoewel hy soms MAN en van die Japannees-vervaardigde vragmotors herstel, sy werkswinkel hom spesifiek op Mercedes-produkte toespits.Van die onderdele word nuut aangekoop, maar hy laat ook nie ’n geleentheid verbygaan om tweedehandse vragmotors, veral dié waarvan dele in ongelukke beskadig is, te koop en die onderdele te herwin nie. Die werkswinkels is ook toegerus om die nodige duikklopwerk aan beskadigde kajuite te doen en as al die werk afgehandel is, sorg die waslokaal dat ’n vragmotor silwerskoon na sy eienaar teruggaan.

Van skroot tot spogvoertuie deur bekwame hande

Kommentaar

Republikein 2025-05-06

Meld asseblief aan om kommentaar te lewer

Van skroot tot spogvoertuie deur bekwame hande

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie