Van mollig tot 'yummy mummy'

Henriette Lamprecht Van die mollige skoolmeisie met die bynaam “Os” is daar vandag geen teken meer nie. In die plek daarvan pryk die 38-jarige ma van twee met elke spier perfek en bruin gespuitverf op 'n internasionale verhoog in 'n fiksheidskompetisie. Sy wou 'n yummy mummy wees, vertel Chantal Williams oor haar fiksheidsreis wat eers begin het ná sy haar kinders gehad het. “Ek het besluit ek gaan nie 'n ma wees wat lyk of die lewe swaar op my skouers rus en alles laat gaan het nie.”Oefen was nooit op hierdie ma se radar nie, erken sy en op skool het sy nie eers aan sport deelgeneem nie. Maar op haar skool se 20 jaar-reünie later vanjaar gaan Chantal beslis 'n paar koppe laat draai met 'n lyf wat goed ontwikkelde skouers, lenige arms, 'n sespak en goed ontwikkelde bene vereis in die kategorie waarin sy deelneem. Sy het na fiksheidstydskrifte gekyk en gedink “so wil ek lyk, wat keer my?” en die pad na die “nuwe” Chantal met ywer in die gim begin aanpak.“Ek het onmiddellik besluit ek wil aan fiksheidskompetisies deelneem.”Chantal erken sy het die eerste drie jaar haarself “dood gekardio” en ure op die oefenfiets, roeimasjien en loopmasjien deurgebring. Haar liggaam het egter nie verander soos dit moes nie.“Dit het my getickle, want ek was dan in sweet gebaai! Ek het gewonder wat ek verkeerd doen, maar kom ek by die huis en ek is honger, dan eet ek 'n broodjie en nog, want ek mag mos!”Sy het besef dit wat sy in die gim doen en dit wat sy geëet het, het nie bymekaar uitgekom nie. Chantal het navorsing oor dieet begin doen. Proteïene is belangrik, daar is sekere tye wat jy koolhidrate moet inneem wanneer die selle “ontvanklik” is vir hierdie kos, en natuurlik moes sy rus ook. “Mense sal nie glo hoe belangrik agt ure se slaap is nie, want dit is wanneer die spier regtig gebou word. Eenvoudig gestel veroorsaak die oefen in die gim klein skeurtjies in jou spier. Dit moet homself herstel en maak 'n spierverdikking, die rede hoekom jy 'n spier begin sien.”Sy het 'n oefenprogram begin volg wat saam met haar dieet 'n daaglikse roetine geword het. Haar dieet is 'n baie belangrike deel van haar program en om elke dag dieselfde kos te eet, kan vervelig raak, erken sy. “Jy moet elke dag dieselfde kos eet en ek dink dít vang die meeste mense. Om te oefen is nog lekker, maar dieselfde dieet is nie so lekker nie! Veral voor die kompetisie moet jy die meeste koolhidrate uithaal, want jy moet regtig slank op die verhoog wees. Dit beteken jy het so 8% liggaamsvet en jou vel is papierdun.”Koolhidrate is nou maar eenvoudig vroue se gemakskombersie, sê Chantal.“Jy is gelukkig wanneer jy dit eet. Eet jy dit nie, kry jy 'n 'swangerskapbrein' en val jy oor jou woorde, gewoonlik voor die kompetisie!”Mense dink jy kan daardie sespak waarmee jy op die verhoog gepryk het, hou, maar helaas nie. “Vroue is nie so gemaak nie, jy het hormone wat moet werk en dit doen hul werk as jy so tussen 15 en 20% liggaamsvet het. Jy kan nie die hele jaar met net 8% liggaamsvet funksioneer nie, dis onmoontlik!” Vir die kategorie waarin Chantal deelneem, is daar in onder meer die bikini-kategorie sekere vereistes waaraan voldoen moet word. Dit sluit lenige skouers, 'n gespierde magie en goed ontwikkelde en gedefinieerde bene in. Voorbereidingstyd is tussen 12 en 16 weke.“Jy kan egter nie vier maande voor die tyd skielik inspring en iets begin doen nie. Jy moes al jou voorbereidingswerk voortdurend gedoen het, slegs dan kan jy jou lyf in 12 weke verander. As jy onder begin, gaan dit nie gebeur nie.”In dié 12 weke verander haar program voortdurend en dit word elke vier weke aangepas. “Kardio word meer, en nader aan die kompetisie oefen jy tot twee ure per dag. Dit is egter ligte kardio en sluit net stap teen 'n helling in, jy wil ook nie jou spiere verloor nie.“Jy doen die inkleurwerk en ek sal dan baie met rekke oefen, eerder as met gewigte, want daardie bouwerk het jy reeds gedoen.”Volgens Chantal bevat haar dieet dan nog koolhidrate en sluit dit hawermout in die oggend en ook rys in.Agt weke voor die kompetisie verdwyn die hawermout en is ontbyt ses tot nege eierwitte met 'n klomp groente. Die rys word met soetpatat vervang.“Dit raak baie eentonig en dit is dít wat die mense mal maak, die elke dag se presies dieselfde kos en spyskaart.”Sy is goed honger in dié tydperk, erken Chantal, sal “dood vir 'n bakkie hawermout” en eet ses keer per dag.“Dis kos met substansie en vesel wat baie belangrik is. 'n Dieet van hoë proteïen maak jou hardlywig, so die vesel is baie belangrik.”Die aanspuit van 'n verbruiningsmiddel die aand voor die kompetisie is 'n moet, en verbruin word daar goed verbruin, sê Chantal.“Die ligte op die verhoog is baie helder om die definisie van jou lyf duidelik te wys. Is jy nie donker genoeg nie, gaan jy maar bleekvaal in die ligte lyk!” Dan is dit mooi sit en lê om seker te maak die verbruiningsmiddel word mooi geabsorbeer en dat jy nie Saterdagoggend vol afgewaste strepe en kolle op die verhoog beland nie. Die dag van die kompetisie is Chantal douvoordag uit die vere, want afgesien van 'n touch-up met die spray tan, is dit tyd vir haar grimering en hare, wat ook eksie-perfeksie moet lyk.“Dit is baie belangrik, want jy kry punte daarvoor. Jou hare moet glansend lyk, jy moet vir die beoordelaars 'bemarkbaar' lyk en die hele pakket tel punte.”Die bikini's waarin sy deelneem, word uit Suid-Afrika bestel en kan haar tot N$4 500 uit die sak jaag.“Dit word spesiaal gemaak en die duur prys daarvan is weens al die 'bling' wat daarop vasgewerk is en natuurlik die tyd wat dit neem om al die kristalletjies vas te werk.” En 'n vrou maak ook nie twee keer in dieselfde bikini haar verskyning op die verhoog nie, sê Chantal. Mense sê dis 'n ydel sport, erken Chantal, maar vir haar is dit nie. “Die tyd wat ons in die gim spandeer en die spesiale dieet wat ons volg, grens vir my daaraan dat jy 'n atleet is.”Buiten uitgawes vir die regte kostuum, is daar ook die dollars vir aanvullings soos wei-proteïne en CLA nodig, asook aminosure en natuurlik haar maandelikse gimlidmaatskap. Oordeel jy haar oor wat sy doen, lê die fout eerder by jou, sê Chantal, en is dit omdat jy nie selfversekerd is nie. “Natuurlik is daar maar baie kompetisie, dis deel van ons samelewing. As jy jaloers is, is dit jou probleem. Ek doen dit vir myself en ek lyk goed terwyl ek dit doen!”Dis 'n baie subjektiewe sport, sê Chantal. Sy kan haar beste bruin lyf voorsit, maar uiteindelik berus die besluit by die beoordelaars.“Jy weet van die begin af waaraan jy jouself onderwerp. Vir my is dit nie 'n probleem nie, die voordeel is dat ek amper 24/7 goed lyk!”Nader aan die kompetisie bestee sy tot twee ure per dag in die gim. Gewoonlik duur dit so 45 minute, maar dan gee sy alles. Sy oefen met intensiteit, sit haarself “deur pyn” en sorg dat sy haarself voortdurend dryf.Konsekwentheid is belangrik, sê Chantal. Volg elke dag jou oefenprogram en sorg dat jy reg eet.“Jy kan sweet en swoeg in die gim, maar as jy nie reg eet nie, help dit jou niks nie.”As jou energievlakke laag is, “doen net wat jy moet en bly net by jou program”.Chantal se twee seuns van onderskeidelik 10 en 12 jaar oud is baie trots op hul mamma. “Ek noem hulle my botterbolbende, maar die oefen is Mamma se ding, nie hulle s'n nie!”As die kompetisie eers verby is, gee sy haarself 'n ruskans en verorber dan die kaneelpannekoeke waarvoor sy so lief is eerder as 'n burger en skyfies. Sy oefen reeds die afgelope vyf jaar en erken op 38 vat haar lyf soms langer om te herstel. “Jou selle hernu hulself egter voortdurend, jy moet dit net goeie boustene gee.”Tog is daar geen ouderdomsbeperking op wat sy doen nie. “Daar is vroue in hul sestigs wat dit doen, niks verhoed jou nie. Die wêreld se oudste vroulike liggaamsbouer is 80 jaar oud!”Moet ook nie dat goed soos rekmerke jou keer nie, sê Chantal, die lewe gaan so vinnig verby, “doen partykeer sommer net iets vir die wow daarvan!”.As sy terugkyk op haar lewe, wil sy kan sê sy het 'n vol lewe gelei. “'n Mens word so vasgevang in die daaglikse drukgang van die lewe - doen net iets!”Om deel te neem aan kompetisies plaas baie spanning op jou lyf en natuurlik jou gemoedstemming. Jy sal dus die ondersteuning van familie en vriende nodig hê om jou te motiveer, maan Chantal. “Ek stap die pad al vyf jaar en ek weet geen hongerdieet en pille sal jou lyf verander soos jy dit wil hê nie. Dit is 'n konstante proses dag in en dag uit, jy moet net jou perfekte balans vind.”• cw.bodysquad@gmail.com

Van mollig tot 'yummy mummy'

Kommentaar

Republikein 2025-06-19

Meld asseblief aan om kommentaar te lewer

Van mollig tot 'yummy mummy'

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie