Van Basterpoeding tot storms

Leandrea Louw - Die skrywer van die bekende Basterpoeding vir die Siel het onlangs haar nuutste boek, Eendag op ‘n Stormdag, bekend gestel. Dit is Clarice Gille-Theys se derde boek ná haar debuut, Rehoboth – Waar my hart is, en Basterpoeding vir die Siel. Eendag op ‘n Stormdag bestaan uit ses kort liefdesverhale. Die eerste verhaal, “Die Pad van haar hart”, vertel die storie van Jasmine en Ryno se verbode liefde. Jasmine en Ryno is oudkollegas en vriende, wat mekaar vir die eerste keer ná 20 jaar weer sien. Een aand van driftige passie lei na ‘n kortstondige verhouding. Met dié kortverhaal laat beleef Clarice jou elke hoogte- en laagtepunt van hul verhouding. Die volgende verhaal, “Die Maskerbal”, speel op ‘n passierskip af waar Sonja ‘n tweede kans op liefde kry. Met “Eendag op ’n Stormdag” het Clarice haar hand aan wetenskapfiksie gewaag en geslaag. Dannielle Gilbert se storie speel in Turkye af, waar sy vakansie gaan hou het ná haar man se dood. Haar vlug huis toe word deur ‘n hewige storm vertraag. Terwyl die storm onverspoosd voortwoed, word sy deur gebeure vasgevang wat sy nie verstaan nie. Die verhaal hou jou vasgevang tot op die bitter einde, waar Dannielle alles wat sy in haar psige onderdruk het op dié stormdag na vore laat kom het. “Jy behoort aan my” vertel van tweede kanse en hoe liefde alles oorkom. “Die pad huis toe” speel op Vineta, Swakopmund, af waar Fransie Mientjies haar pad huis toe vind ná ‘n stryd teen dwelmverslawing. Dit vertel van die onherroeplike en oneindige liefde tussen ma en dogter. Die Visriviervallei is die tuiste vir die laaste verhaal, “Die swart hings se traan”, waar twee vriende en twee vreemdelinge die vallei verken. Lara probeer tot verhaal kom ná sy met Guillain-Barré-sindroom gediagnoseer is, Heinrich en Sharon verwerk albei die dood van ‘n geliefde en Tersius sit met onbeantwoorde vrae ná sy vrou hom sonder verduideliking los en terug Duitsland toe gaan. Gedurende hul reis deur die vallei het die vier verskeie struikkelblokke teëgekom, maar vind uiteindelik genesing vir hul wonde. Clarice is ‘n uitstekende storieverteller en boei die leser van die eerste tot die laaste bladsy. Romanse, verraad, gesondheid, liefde, skeiding en vergifnis word alles in een boek saamgevat. Clarice het haar skryfloopbaan as vryskutjoernalis en as sosiale etiket-kritikus by die Namib Times begin. “Ek het altyd geweet, selfs toe ek nog baie besig in die korporatiewe wêreld was, dat ek ‘skrywer’ agter my naam gaan skryf. Dit was net ’n kwessie van tyd en natuurlik was daar dinge wat eers in plek moes val. Ek is nou in die baie bevoorregte posisie om van die huis af te werk, my eie klein ‘heiligdom’ te hê waar ek met woorde kan speel, en daagliks en selfs soms tot diep in die nag op my muse te wag vir daai ekstra inspirasie om iets neer te pen wat lesers werklik sal boei.”Sy vertel haar verlange na haar geboortedorp, Rehoboth, het aanleiding tot haar eerste boek gegee. “Ek is ’n Rehoboth-Baster in murg en been, en ná ek in 1999 met my man, Donovan, getrou het en na Swakopmund moes verhuis, het ek baie eensaamheid en alleenheid ervaar. My man, toe nog by Rössing werksaam, het gereeld naweke en laat ure gewerk. Hy wou net die beste vir sy nuwe gesin bied en het onverpoosd gewerk. “Die nat weer en min son op Swakopmund het vir my, ’n songek mens, menige dag redelik depressief gelaat. My enigste uitlaatklep was skryf, en dít was toe presies wat ek gedoen het. Die ander rede was dat ek aanvanklik die stories van my geboortedorpie lewendig wou hou. Ek was toe langer as ’n maand op Rehoboth om met die ouer garde oor hul stories te gesels. “Dit het egter nie vrugte afgewerp nie, want almal met wie ek gesels het, kon hul herinneringe met liefde onthou, maar kon dit nie meer sinvol oorvertel nie. Ek het toe besluit om die reis solo aan te pak en my eie stories te vertel.“Ná die sukses van Rehoboth – Waar my Hart is, het ek besluit om op ’n ander genre te fokus. Ek wou ’n boek met dagstukkies vir die hele jaar die lig laat sien. Die reeks Chickensoup for the Soul deur Jack Canfield was my inspirasie, en ek het nie lank gesoek na ’n soortgelyke dis in Namibië wat dieselfde effek as hoendersop vir die Amerikaners het nie. Daar is nie ’n mens in Namibië wat nie weet wat Basterpoeding is nie. Die stories is net so veelsydig en uiteenlopend soos dié gewilde dis. “Net soos jy Basterpoeding as heerlike bykos informeel saam met ’n braai kan geniet, kan jy dit ewe formeel op ’n selfdientafel by ’n galageleentheid bedien. Dit is dus ’n mengelmoes van diep, eg menslike stories wat ’n kykie gee in ons weerloosheid, ons pyn, ons hartseer en ook ons vreugde en genesing.”Clarice sê baie mense dink mens kan net gaan sit en ‘n storie skryf, maar dit is nie so nie. “Dis harde werk en kom op goeie beplanning neer. Jy moet ’n storie-opsomming het. Dit bestaan uit stappe waar jy byvoorbeeld op ’n merkwaardige gesigspuntkarakter besluit. Dan besluit jy op ’n storieprobleem. Daarna die doel en uitkoms, en voeg ander karakters by. Jy moet ook besluit op die visioentoneel, sowel as die swart oomblik en daarna die ommeswaai. As skrywer moet jy ook jou eie werk redigeer en kortknip, want mens moet waak teen lang, oorvolledige skryfwerk. Deesdae neig ons na ekonomie van die woord en gedagte. Ons pik net die nodigste uit om die lesers ’n idee te gee. Ons fokus meer op essensie en op dit wat nuut, vars en anders is.” Eendag op ’n Stormdag is by Book Buddy Namibia in Windhoek beskikbaar, en bestellings by Clarice self teen N$240 per boek word ook verwelkom.

Van Basterpoeding tot storms

Kommentaar

Republikein 2026-02-04

Meld asseblief aan om kommentaar te lewer

Van Basterpoeding tot storms

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.