Val in hulpbronpryse vir eers verby, sê Billiton

Die mynmaatskappy BHP Billiton meen die val in hulpbronpryse tot die laagste vlak in ’n kwarteeu is verby.Billiton het Dinsdag ’n reusagtige verlies van US$6,4 miljard vir die jaar tot einde Junie bekend gemaak. Dit is deels aan die skerp val in hulpbronpryse tot die laagste vlak in 25 jaar toegeskryf.Dit is die eerste verlies in ’n boekjaar sedert die maatskappy in 2001 in ’n samesmelting tot stand gekom het.“Ons kry die gevoel dat pryse ophou val het,” het Andrew Mackenzie, uitvoerende hoof, op ’n mediakonferensie gesê.“Ons gaan die nuwe boekjaar met werklike momentum begin.”BHP Billiton se aandeelprys het stewig met amper 5% tot R186,37 gestyg nadat sy resultate getoon het in die laaste halfjaar het sy onderliggende toeskryfbare wins amper verdubbel. Gediversifiseerde myngroepe gebruik onderliggende toeskryfbare winssyfers om ’n werklike prentjie van hul bedrywighede te gee. Dit sluit eenmalige items uit, asook bedrywighede wat gestaak is.Hulpbronpryse het herstel sedert die laagtepunt in Januarie en het in die tweede kwartaal die skerpste kwartaalstyging sedert 2010 getoon.Peter O’Connor, ’n ontleder by Shaw and Partners van Sydney, meen die resultate vir dié boekjaar is waarskynlik die laagtepunt vir die mynmaatskappy.“Hulpbronpryse verswak nie meer nie,” sê Colin Hamilton, ’n ontleder by Macquarie in Londen.“Die vraag uit China was vir die eerste keer in jare beter as verwag. Die vraag is of dit volgehou kan word.”Die herstel in hulpbronpryse en volumes gaan na verwagting BHP Billiton se wins van dié rekordlaagtepunt af help herstel.Sy onderliggende toeskryfbare wins van US$1,2 miljard in die afgelope boekjaar is die laagste sedert Billiton tot stand gekom het, maar was beter as die voorspelling van ontleders wat aan ’n peiling deelgeneem het.Die ontleders verwag die onderliggende toeskryfbare wins gaan in die huidige boekjaar tot US$2,4 miljard styg, en in die daaropvolgende boekjaar tot US$3,6 miljard.Billiton sê in ’n verklaring China se ekonomiese groei het gestabiliseer en die Chinese regering gaan na verwagting die ekonomie bly ondersteun.Ben Cleary, ’n portefeuljebestuurder van Tribeca Investments in Australië, meen egter daar hang nog talle vrae oor die rigting wat Billiton met sy olie- en gasbedrywighede inslaan.“Ons weet dit is ’n geldput, maar die kans om vorentoe ’n wins te maak, is afhanklik van hoër oliepryse en baie kapitaalbesteding.”Die ramp by sy Samarco-slikdam in Brasilië in November verlede jaar waarin 19 mense dood is, het die maatskappy miljarde dollars gekos.Dié myn word saam met Brasilië se Vale bedryf.Sy dividend vir die boekjaar het met 76% tot 30c per aandeel geval. – Netwerk24/Bloomberg

Val in hulpbronpryse vir eers verby, sê Billiton

Kommentaar

Republikein 2026-01-20

Meld asseblief aan om kommentaar te lewer

Val in hulpbronpryse vir eers verby, sê Billiton

Kommentaar

Republikein 2026-01-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.