Vaarwel aan legendariese oorlogfotograaf
Hy word as ’n dapper vryheidsvegter met ’n kamera as wapen onthou.
Francoise Steynberg - Die bekende oorlogfotograaf John Liebenberg (61) het gisteroggend in ’n hospitaal in Johannesburg gesterf.
John Arthur Liebenberg, wat op 3 Maart 1958 in Johanneburg gebore is, was bekend vir sy briljante foto’s uit die Namibiese vryheidstryd en Angolese burgeroorlog.
Volgens ’n bron na aan die familie het Liebenberg verlede week by sy huis geval en sy femur gebreek.
“Hy is toe geopereer, was steeds in die hospitaal en het toe Sondag in die oggendure vermoedelik ’n embolisme gehad.”
Sy jongste seun, Emile (14), het nog Vrydagaand by hom in die Olivedale-kliniek gaan kuier.
Liebenberg het in 1976 in Namibië begin werk en in 1985 is hy as fotograaf by The Namibian aangestel.
Ná onafhanklikheid het hy en sy familie na Johannesburg teruggekeer vanwaar hy vir Reuters foto’s van die Angolese burgeroorlog geneem het.
Hy het later by Media24 se tydskrifte aangesluit en hoofsaaklik vir Drum gewerk. Sy fotografiewerk is wyd in Afrika, Amerika en Europa uitgestal.
Liebenberg se uitstallings sluit in Rise and Fall of Apartheid in kunsgalerye in New York, München, Milaan en Johannesburg, Namibia by die eerste African Photography Encounters in Bamako, Framing Fashion in die Brighton-museum in Engeland en die Kontemporêre Afrika-kunsfees in New York.
Boeke uit sy pen sluit in Bush of Ghosts: Life and War in Namibia, en Namibia, wat saam met vyf ander fotograwe gepubliseer is.
Sy Namibiese fotografieversameling, veral oor die Namibiese vryheidstryd, word wyd deur historici, navorsers en filmmakers gebruik.
Op sy Facebook-blad stroom huldeblyke van heinde en verre in.
“John het sy lewe op die spel geplaas vir die vryheid van ons mense. Ons is saam in Januarie 1986 in hegtenis geneem as deel van die Katutura 58. Ek is hom vir altyd dankbaar en het diep waardering vir die uitstekende werk wat hy gedoen het,” skryf die Namibiese ambassadeur in China, mnr. Elia Kayamo.
Olle Eriksson onthou Liebenberg as “’n dapper vryheidsvegter met ’n kamera as wapen”.
Liebenberg word oorleef deur sy vier kinders, Joseph (33), Jessica (30), Max (24), en Emile (14) en sy vyf maande oue kleinseun, Leo.
Joseph is ’n prokureur in Johannesburg, Jessica woon en werk in Duitsland, Max studeer musiek in Switserland en Emile is op skool in Johannesburg.
- [email protected]
John Arthur Liebenberg, wat op 3 Maart 1958 in Johanneburg gebore is, was bekend vir sy briljante foto’s uit die Namibiese vryheidstryd en Angolese burgeroorlog.
Volgens ’n bron na aan die familie het Liebenberg verlede week by sy huis geval en sy femur gebreek.
“Hy is toe geopereer, was steeds in die hospitaal en het toe Sondag in die oggendure vermoedelik ’n embolisme gehad.”
Sy jongste seun, Emile (14), het nog Vrydagaand by hom in die Olivedale-kliniek gaan kuier.
Liebenberg het in 1976 in Namibië begin werk en in 1985 is hy as fotograaf by The Namibian aangestel.
Ná onafhanklikheid het hy en sy familie na Johannesburg teruggekeer vanwaar hy vir Reuters foto’s van die Angolese burgeroorlog geneem het.
Hy het later by Media24 se tydskrifte aangesluit en hoofsaaklik vir Drum gewerk. Sy fotografiewerk is wyd in Afrika, Amerika en Europa uitgestal.
Liebenberg se uitstallings sluit in Rise and Fall of Apartheid in kunsgalerye in New York, München, Milaan en Johannesburg, Namibia by die eerste African Photography Encounters in Bamako, Framing Fashion in die Brighton-museum in Engeland en die Kontemporêre Afrika-kunsfees in New York.
Boeke uit sy pen sluit in Bush of Ghosts: Life and War in Namibia, en Namibia, wat saam met vyf ander fotograwe gepubliseer is.
Sy Namibiese fotografieversameling, veral oor die Namibiese vryheidstryd, word wyd deur historici, navorsers en filmmakers gebruik.
Op sy Facebook-blad stroom huldeblyke van heinde en verre in.
“John het sy lewe op die spel geplaas vir die vryheid van ons mense. Ons is saam in Januarie 1986 in hegtenis geneem as deel van die Katutura 58. Ek is hom vir altyd dankbaar en het diep waardering vir die uitstekende werk wat hy gedoen het,” skryf die Namibiese ambassadeur in China, mnr. Elia Kayamo.
Olle Eriksson onthou Liebenberg as “’n dapper vryheidsvegter met ’n kamera as wapen”.
Liebenberg word oorleef deur sy vier kinders, Joseph (33), Jessica (30), Max (24), en Emile (14) en sy vyf maande oue kleinseun, Leo.
Joseph is ’n prokureur in Johannesburg, Jessica woon en werk in Duitsland, Max studeer musiek in Switserland en Emile is op skool in Johannesburg.
- [email protected]
Kommentaar
Republikein
Geen kommentaar is op hierdie artikel gelaat nie