UPM hou derde kongres

Augetto Graig - Die United People's Movement (UPM) het verlede naweek hul derde nasionale kongres gehou waartydens nuwe leiers vir hul vroue- en jeugliga gekies is. Dié twee politieke organe van die party was die afgelope drie jaar leierloos. Me. Hannalore Lottering van die Hardapstreek is tot nasionale voorsitter vir die vroueliga (UPMWL) verkies, met me. Anna Maricia Titus van Erongo as ondervoorsitter. Me. Anceline van Wyk is tot nasionale tesourier, en me. Ida Owoses tot nasionale sekretaris van die Otjozondjupastreek verkies. Mnr. Mario Katjau van die Erongostreek sal nou die jeugliga (UPMYL) se sekretaris-generaal wees.Mnr. Silvanus Kharaseb van die Hardapstreek is die nuwe voorsitter, terwyl mnr. Reagon Beukes van die //Kharasstreek tot ondervoorsitter verkies is.Me. Tanya van Rooi van die Hardapstreek is die nasionale sekretaris, en me. Julia Khaeses is die nasionale tesourier. Mnr. Stanley Rooinasie, ook van Otjozonjupastreek, is haar nuwe adjunk.Mnr. Jan van Wyk, UPM-parlementslid, het die kongrespartyleiers versoek om toegewyd en gedissiplineerd te wees. “Ons as leiers moet ’n voorbeeld stel,” het hy gesê “Die UPM is nie bereid om leiers wat nie toegewyd is nie in posisies te hou nie,” sê hy. Dit volg ná sekere leiers nie by die kongres teenwoordig was nie. “Die UPM sal nie gyselaar gehou word deur dié in sleutelposisies nie,” het Van Wyk gesê.By die kongres is dele van die party se grondwet verander om die sekretariaat kleiner te maak, om die sekretaris-generaal se posisie na ’n voltydse een te verander en om komende vergaderings van die sentrale komitee jaarliks tussen Januarie en Februarie te hou. Daar is ook besluit dat die president en die adjunkpresident lewenslange lidmaatskap van die uitvoerende komitee, sentrale komitee en die kongres kry sonder stemreg ná aftrede.Van Wyk het ook die situasie op Rehoboth aangespreek. Hy sê die party probeer al jare tevergeefs om die owerhede te oortuig om aksie teen korrupsie in die dorpsraad, tradisionele owerhede en staatsondernemings op die dorp te neem. “Die UPM wil by die minister van stedelike en landelike ontwikkeling weet waarom sy nie teen die Rehoboth-dorpsraad (RTC) kan optree nie. "Die minister het erken dat ondersoeke onreëlmatighede by die RTC gevind het. Sy het verder aangedui dat mnr. Willie Swartz onwettig by die Rehoboth-dorpsraad is. "Sy het sonder sukses die RTC by verskeie geleenthede opdrag gegee om haar instruksies en aanbevelings te implementeer. Sy is bewus van die feit dat die Swapo-lede van die raad besluit het om nie haar instruksies te volg nie, maar sy versuim om van haar bevoegdhede gebruik te maak,” sê hy.Van Wyk het die party se goedkeuring versoek om lede toe te laat om by Rehoboth-inwoners betrokke te raak sodat regsaksie teen die minister ingestel kan word. Die party het die versoek goedgekeur en lede is aangemoedig om bydraes tot die finansiering daarvan te lewer, aangesien die UPM nie dié aksie finansieel kan ondersteun nie.

UPM hou derde kongres

Kommentaar

Republikein 2026-09-18

Meld asseblief aan om kommentaar te lewer

UPM hou derde kongres

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.