UNWTO-beraad stel Afrika eerste

Augetto GraigDie Verenigde Nasies se Wêreldtoerisme-organisasie (UNWTO) het gister sy streekkonferensie in Windhoek afgehandel. Ministers en hoëvlak-amptenare verantwoordelik vir toerisme in Afrika het die konferensie sedert Maandag virtueel en in persoon bygewoon. Die geleentheid se doelwitte sluit in die verbetering van Afrika se beeld as 'n gesogte toerismebestemming, die betrekking van die openbare en private sektor om positiewe stories oor Afrika-toerisme te versprei, om die vermoë van bestemmings in Afrika te versterk veral ten opsigte van handelsmerk-ontwikkeling, om klein- en medium-toerisme-ondernemings te versterk om meer mededingend te wees, en om toegang tot kapitaal vir toerisme-ondernemings tydens Covid-19 te ontleed.By die opening van die konferensie het president Hage Geingob gesê toerisme speel 'n noodsaaklike rol in die land se ekonomie en hy verwelkom die konferensie om die vinnige herstel van toerisme in die wêreld te fasiliteer. Toerisme worstel steeds met die impak van Covid-19 wêreldwyd en in Namibië, sê hy. Die hoogs aansteeklike viruspandemie het in Maart 2020 eensklaps tot 'n 96% afname in wêreldwye reise gelei, het Geingob gesê.“Selfs met die bemoedigende nuus rakende die ontwikkeling van Covid-entstowwe wat hoop vir die herstel van die toerismebedryf en reis bied, bly daar uitdagings en die sektor verwag om tot diep in 2022 steeds negatiewe tot geen groei te toon,” sê hy.Geingob het gepraat oor Namibië se strategie vir toerisme-herlewing wat in Junie 2020 voorgestel is en hoe plaaslike toerisme sekere instansies steeds op die been kon hou. “Nogtans kan plaaslike toerisme net gedeeltelik vergoed vir die verlies van inkomende toeriste. Ware herstel sal slegs moontlik wees wanneer internasionale toerismevlakke na pre-Covid-vlakke terugkeer,” sê hy.Die effektiewe toepassing van die UNWTO se agenda vir Afrika 2030: “Toerisme vir insluitende groei”, is dus belangriker as ooit, sê Geingob.Die staatshoof sê Afrikalande moet hul benadering tot toerismebeleidskepping koördineer terwyl wêreldwye samewerking en bewys-gebaseerde oplossings die veilige reis van toeriste, en die opheffing van reisbeperkings moet verseker. “Ná die pandemie sal ons vermoë noodsaaklik wees om veerkragtigheid binne toerisme te herstel, nie net om die volgehoue groei van dié sektor te verseker nie, maar ook voorbereiding teen toekomstige skokke te verhoog.”Geingob dring aan op gesamentlike handelmerk-ontwikkeling vir die vasteland om Afrika as 'n topbestemming vir toerisme en sakereise te vestig. “Ons moet ten volle verbind wees tot Afrika as 'n handelsmerk, wat een van die prioriteite van die UNWTO-agenda vir die vasteland is. Om dit te bereik, moet ons ons mediaplatforms gebruik om Afrika-vermoëns, innovasies en prestasies ten toon te stel en te vier,” sê hy.Die uitvoerende hoof van die Gasvryheidsvereniging van Namibië (HAN), me. Gitta Paetzold, het tydens 'n onderhoud gesê die feit dat bykans 60 ministers en topbeamptes vir die konferensie na Windhoek gekom het, is 'n pluimpie vir Namibië. Volgens Paetzold is dit nou 'n goeie tyd vir die ganse UNWTO om die waarde van toerisme vir Afrika te sien en die bedryf op 'n internasionale vlak te help bemark. “Ons is op die regte pad; 'n begin is gemaak. Dis nou tyd vir Afrika,” sê sy.– augetto@republikein.com.na

UNWTO-beraad stel Afrika eerste

Kommentaar

Republikein 2025-06-18

Meld asseblief aan om kommentaar te lewer

UNWTO-beraad stel Afrika eerste

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie