Unie neem deel aan stryd teen geslagsgeweld

Maria Eiseb - Die Metaal- en Verwante Werkers­unie van Namibië (Manwu) het onlangs 'n twee dae lange byeenkoms oor geslagsgeweld in Windhoek gehou.

Tydens die opening van die geleentheid het die adjunkspeaker, me. Loide Kasingo, in haar toespraak gesê die kwessie van geweld teen vroue en kinders moet ernstig aangespreek word.

“Dit is hoog tyd dat gedrag teenoor kinders en vroue verander,” het sy gesê.

“Ek wil weet watter tipe wapens die manne gebruik wanneer hulle weer­lose mense aanval en seermaak. Ons moet die oorsaak van die daad aanspreek,” het Kasingo gesê.

Sy het gesê die meeste gevalle van huishoudelike geweld vind plaas in huise waar mag misbruik word.

“Ek is daarvan ingelig dat Manwu 'n geslagsgebaseerde geweld (GVB)-program en -beleid het. Daarom doen ek 'n beroep op alle vakbonde in Namibië om hul voorbeeld te volg,” het Kasingo gesê.

Afgesien van Manwu het verteenwoordigers van die Vroue-aksie vir Ontwikkeling (WAD), die ministerie van geslagsgelykheid en kinderwelsyn, die Nasionale Jeugraad, die Universiteit van Namibië (Unam), die ministerie van veiligheid en sekuriteit en die Raad van Kerke in Namibië aan die byeenkoms deelgeneem.

Mnr. Isak Khairabeb van Tsumeb het gesê die oorsaak van geslagsgeweld is 'n tekort aan wedersydse respek vir mekaar.

“Elkeen het sy eie wil en doen wat hy wil,” het Khairabeb gesê.

Nog 'n deelnemer, wat verkies om anoniem te bly, blameer die afwesigheid van godsdienstigheid vir die situasie.

Tydens die opening het Manwu se president, mnr. Angula Angula, gesê die byeenkoms het ten doel gehad om die lede van die unie bewus te maak van die feit dat geslagsgeweld ook by die werk kan plaasvind.

“Unielede moet as die verteenwoordigers van die streke dié boodskap aan die gemeenskap gaan oordra,” het hy gesê.

Volgens Angula het die byeenkoms gefokus op oorsake van en oplossings vir geslagsgeweld, die impak wat dit op huishoudings en die gemeenskap het, en hoe om geslagsgeweld in die werks­omgewing uit te roei.