Unam-staking duur voort

Augetto Graig - Werknemers aan die Universiteit van Namibië (Unam) het Maandag onder leiding van die Namibiese Nasionale Onderwysersunie (Nantu) aan ’n staking voor die universiteit se hekke deelgeneem.Volgens die groep sal die staking voortduur tot die universiteitsbestuur instem om hul salarisse met 6%, terugwerkend van Januarie vanjaar af, te verhoog. Mnr. Johannes Haufiku, ’n Unam-woordvoerder, het die staking Maandag bevestig. Volgens mnr. Muree Tjiueza, van Nantu, het Unam die reëls van die staking geminag.“Unam het ingestem om skoon drinkwater en toiletgeriewe aan stakende werknemers te voorsien en hulle het geweet ons begin Maandag om 07:30 met die bedryfsaksie. Tog is dié geriewe eers tussen 11 en 12, ná verskeie navrae, beskikbaar gestel,” het hy gesê.Volgens Tjiueza doen gerugte die ronde dat die universiteit mense van buite af werf om noodsaaklike poste waar te neem, wat glo ook teen die reëls van die staking is.Ondanks die universiteitsbestuur se waarborg dat die staking studente wat eksamen skryf nie sou raak nie, verneem Republikein van derdejaarstudente op Otjiwarongo wat nie hul eksamen kon aflê nie.Me. Esmé du Plessis, ’n student se ma, sê: “Die staking raak die studente beslis. Ek dink nie die volle waarheid en omvang van die staking word werklik besef nie.” Tjiueza het bevestig onreëlmatighede bestaan wel – veral by Unam-kampusse elders in die land.Hy het sy kommer uitgespreek oor ’n voorval waarvolgens ’n Unam-bestuurder, wat ook op Swakopmund studeer, glo ’n kluis se sleutel by ’n stakende personeellid geneem het, eksamenvraestelle uit die kluis gehaal het en self oor ’n eksamensessie toesig gehou het.“Daardie eksamen moet nietig verklaar word,” het Tjiueza gesê.Volgens hom is soortgelyke probleme by die Hifikepunye Pohamba-kampus op Ongwediva ervaar. “Dieselfde kwessies kom daar voor, maar ons moet meer daaroor uitvind. Ons hoor ook die bestuur het mense van Windhoek af laat invlieg om toesig te gaan hou. Dit is ook teen die reëls van die staking,” het hy gesê. Unam se amptelike woordvoerder, mnr. Edwin Tjiramba, het benadruk die universiteit kom die reëls vir die staking “tot op die laaste letter” na. Hy het die bewering ontken dat Unam mense van buite af gekry het om die werk van stakende personeel te doen.“Die universiteit is ‘n wetsgehoorsame en verantwoordelike instelling en sal dit nooit doen nie,” het Tjiramba gesê.Volgens hom gaan alle werksaamhede by die universiteit “ongehinderd” voort. “Eksamens is nie in die gedrang nie en gaan voort soos geskeduleer. Alle personeel buite die onderhandelingspan, asook dié in die onderhandelingspan wat nie aan die staking deelneem nie, voer hul pligte uit om te verseker die eksamens, as kern van die universiteit, gaan ongehinderd voort.”Volgens Tjiramba word drie eksamensessies per dag sedert 18 Oktober aan 1 500 studente gebied. Die eksamens loop op 8 November ten einde. Hy sê sowat 27 000 studente is vanjaar aan die universiteit ingeskryf.Tjiramba sê geen eksamens is by enige van die universiteit se 12 kampusse gekanselleer nie. “Ons het egter aan studente by die Otjiwarongo-sentrum die opsie gegee om hul eksamens by enige ander Unam-sentrum of –kampus af te lê, of om vir aanvullende eksamens aansoek te doen.”Die enigste personeellid by die Otjiwarongo-sentrum neem aan die staking deel en studente wat Dinsdag hier wou skryf, moes voor dooiemansdeur omdraai, het hy gesê.Tjiramba het beklemtoon die stakingskwessie moet vriendskaplik opgelos word. “Die universiteit bly ontvanklik daarvoor om enige tyd met vakbonde te onderhandel.” Volgens hom word daar nie tans onderhandel nie.Die universiteit sluit op 14 Desember.

Unam-staking duur voort

Kommentaar

Republikein 2025-10-23

Meld asseblief aan om kommentaar te lewer

Unam-staking duur voort

Kommentaar

Republikein 2025-10-23

Meld asseblief aan om kommentaar te lewer

MELD AAN

Advertensie