Unam bly by aanlyn-onderrig ten spyte van struikelblokke

Die Universiteit van Namibië (Unam) gaan voort met aanlynonderrig ten spyte van klagtes van sommige studente dat die elektroniese onderrigstelsel verskeie tegniese probleme het wat daartoe lei dat studente druip en die kwaliteit van onderrig swak is. Die universiteit het in April verlede jaar met die aanvang van die Covid-19-pandemie in die land met aanlynonderrig begin.
Volgens Unam se woordvoerder, mnr. John Haufiku, gaan die universiteit tot die einde van die jaar voort met aanlynonderrig.
"Die universiteit het in oorweging geneem dat daar net twee maande oor is voordat die semester eindig. Die logistiek vir beide studente en dosente in terme van die terugkeer na aangesig-tot-aangesig-onderrig is ook in aanmerking geneem," het Haufiku gesê.
Hy het erken daar is uitdagings, maar 80% van studente het toegang tot kwaliteit onderrig deur middel van die elektroniese platform. - Nampa