Uitvoerende hoofde positief al sukkel ekonomie

Elvira Wood - Uitvoerende hoofde in Afrika mag dalk nie baie optimisties wees dat die ekonomie die volgende jaar veel gaan groei nie, maar hulle het 'n veel rooskleuriger vooruitsig vir hul eie ondernemings.PwC se Afrika Sake-agendaverslag wat Dinsdag in Rosebank, Johannesburg, bekend gestel is, wys 85% van die 80 uitvoerende hoofde wat aan die peiling deelgeneem het, glo hul maatskappye kan in 2017 groei toon.Net 30% van hulle dink egter die wêreld se ekonomie sal in die volgende 12 maande groei.PwC het die navorsing in die vierde kwartaal van 2016 gedoen. Ongeveer 40% van die hoofde in die peiling staan aan die hoof van maatskappye wat meer as US$100 miljoen per jaar in inkomste genereer.Hein Boegman, uitvoerende hoof van PwC in Afrika, sê wanneer daar na die bevindinge gekyk word, moet 'n mens onthou uitvoerende hoofde is van nature optimisties oor die maatskappye onder hulle vlerk.Ongeag die feit dat die sakeleiers positief is oor hul eie ondernemings, is hulle baie bekommerd oor die onsekerheid van ekonomiese groei (90%) en die wisselvalligheid van wisselkoerse (90%).Dion Shango, uitvoerende hoof van PwC in Suider-Afrika, sê uitvoerende hoofde is ook bekommerd oor wat die direkte invloed op hul maatskappye kan wees weens 'n gebrek aan skaars vaardighede (80%), wisselvalligheid in die koste van energie (73%) en die toenemende bedreiging wat kubermisdaad (71%).“Kubermisdaad is al hoe meer deel van sake doen en dit sluit Afrika in. Daar word meer gefokus op hoe dié probleem hanteer word,” sê hy.GroeiUitvoerende hoofde glo hulle inkomste gaan groei deur organiese groei (80%), nuwe strategiese alliansies en vennootskappe (69%), en kostebesparing (68%).“Wat eienaardig is, is dat net 38% van hulle sê hulle oorweeg samesmeltings en verkrygings,” sê Boegman.“Mens sou dink te midde van 'n uitdagender ekonomie daar heelwat winskope vir die sterker maatskappye sal wees.”Wat vaardighede betref het 51% gesê hulle beplan om in die volgende jaar hul arbeidsmag uit te brei.“Dit is nie onverwags nie, veral omdat die meeste van hulle aangedui het hulle wil hul ondernemings organies laat groei,” sê Boegman.23% het egter gewaarsku hulle kan weer mense uit diens stel, wat ook weer sin maak weens die toenemende fokus op kostebesparing.“Wat interessant is, is dat waar uitvoerende hoofde wel aangedui het dat hulle mense uit diens gaan stel, dit in 72% van die gevalle vanweë outomatisasie gaan wees,” sê Boegman.Die groot uitdaging vir uitvoerende hoofde is om skaars vaardighede te bekom.“Leiers is op soek na vaardighede soos aanpasbaarheid, probleemoplossing, leierskap en kreatiwiteit, want dit is moeilik om aan te leer en te outomatiseer,” sê Shango.Volgens Shango sien die meeste uitvoerende hoofde in Afrika die toekoms vir hul maatskappye in internasionale markte in die VSA (31%), China (28%) en Brittanje (24%) terwyl hulle in Afrika op Johannesburg (36%), Lagos (16%) en Kaapstad (14%) fokus. – Netwerk24

Uitvoerende hoofde positief al sukkel ekonomie

Kommentaar

Republikein 2025-09-19

Meld asseblief aan om kommentaar te lewer

Uitvoerende hoofde positief al sukkel ekonomie

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie