Uitvoerende hoof wéér geskors

Mnr. Christoph /Uirab, uitvoerende hoof van die Rehoboth-dorpsraad, het Saterdag ’n brief ontvang waarin hy verwittig is dat hy met ingang 29 September geskors is. Volgens die brief is die besluit tydens 'n spesiale vergadering Vrydag geneem om hom met onmiddellike effek op 14 verskillende aanklagte teen hom te skors. Mnr. Winston /Uirab, voorsitter van die dorpsraad se bestuurskomitee, het die skorsing bevestig en gesê 'n verhoor sal op 19 Oktober gehou word. “Ek kan bevestig hy is geskors om die raad genoeg tyd te gun om die beweringe teen hom te ondersoek en om enige inmenging van sy kant te vermy,” het /Uirab gesê. Volgens die brief is die skorsing ’n voorsorgmaatreël omdat /Uirab na bewering tydens verskeie geleenthede met die ondersoek teen hom ingemeng het, en dit die afhandeling daarvan en die begin van dissiplinêre optrede vertraag het. /Uirab het glo twee werknemers met dissiplinêre optrede gedreig, sou hulle enige verklarings gee aan mnr. Borris Isaacks wat die verhoor lei. Daar word voorts ook beweer /Uirab het geweier om hom aan ’n ondersoek vir wangedrag te onderwerp. Dit is die tweede keer dat /Uirab geskors word. Hy is op 12 September verlede jaar vir beweerde diensweiering en ook seksuele teistering van die voormalige finansiële bestuurder van die stadsraad, me. Jennifer Kays, geskors. Hy is egter op 15 September 2016 heraangestel. Benewens die hangende aanklagte teen hom is nuwe klagte van diensweiering bygevoeg. Ook het hy na bewering nie 'n raadsbesluit uitgevoer om die tender van die veiligheidswagte te beëindig deur drie maande kennis aan die gekontrakteerde maatskappye te gee en om die tenders weer te adverteer nie.Op die onlangse klagstaat word /Uirab van nalatigheid beskuldig omdat hy die dorp se elektrisiteitsrekeninge wat in Februarie vanjaar op N$19 miljoen gestaan het, tot die jongste syfer van N$ 43 miljoen laat ophoop het.Hy het na bewering ook versuim om 'n begroting vir die eerste drie maande van die nuwe boekjaar in te dien, iets wat die stadsraad in ’n slegte lig by die ministerie van stedelike en landelike ontwikkeling stel./Uirab het ook glo geweier om tjeks te onderteken vir die betaling van die prokureur mnr. Christopher Stanley, wat die raad in 'n belangrike siviele saak teen Rehoboth Properties verteenwoordig het./Uirba het Saterdag bevestig hy het die brief ontvang. Volgens hom is dit egter onwettig omdat die ministerie van landelike en stedelike ontwikkeling nie geraadpleeg is nie. “Op hierdie oomblik kan ek nie die inhoud van die brief bespreek nie. Al wat ek kan sê, is dat ek die brief Saterdag ontvang het. Ek moes dit eers Maandag ontvang en hoekom ek dit oor die naweek gekry het, weet net hulle alleen. Dit is die tweede keer dat ek onwettig en sonder om die regte prosedure te volg, geskors word,” het /Uirab gesê. - NAMPA

Uitvoerende hoof wéér geskors

Kommentaar

Republikein 2025-05-08

Meld asseblief aan om kommentaar te lewer

Uitvoerende hoof wéér geskors

Kommentaar

Republikein 2025-05-08

Meld asseblief aan om kommentaar te lewer

MELD AAN

Advertensie