Uitsetting dreig vir studente in Lusaka

Jana-Mari Smith – Sowat 25 Namibiese mediese studente wat tans in Lusaka in Zambië studeer, kan moontlik volgende Maandag hul blyplek kwyt wees, omdat die ministerie van gesondheid en maatskaplike dienste na bewering nie hul huurgeld betaal het nie.Die studente het laas naweek kennisgewing van een week ontvang waarin die verhuurder hulle meedeel die ministerie het “ten spyte van ons beste pogings” sedert Januarie nie vir hul verblyf in Crystal Gardens in Lusaka betaal nie.“Ons kon geen belofte van hulle kry nie en talle van ons briewe het onbeantwoord gebly,” lui die kennisgewing wat op 29 Mei uitgereik is.Die verhuurders het om verskoning gevra vir die ongerief wat dit vir die studente veroorsaak, maar die wanbetaling laat hulle met geen ander keuse nie.“Dit is onwaarskynlik dat die ministerie die situasie binnekort sal beredder en daarom het ons die kwessie aan ons prokureurs oorhandig. Die huurgeld is nou ses maande agter en daarom kan ons julle vanaf 7 Junie nie meer akkommodeer nie.”As gevolg van die wanbetaling kan die onderneming nie bedryfskostes dek nie, luidens die kennisgewing.NÊRENS OM TE GAANDie studente sê hulle het nêrens om heen te gaan nie en sê ondanks herhaalde pleidooie aan die ministerie vir hulp het daar nog niks van gekom nie.’n Student wat anoniem wil bly, het gesê hulle het die betrokke kantoor in die ministerie om hulp gevra en daar is aan hulle gesê die betalings word nog verwerk, of die probleem lê by die ministerie wat die geld beskikbaar moet stel.“Dit is ernstig. As betalings nie teen Maandag gedoen word nie, het ons nêrens om heen te gaan nie,” het een van die studente aan ons susterkoerant Namibian Sun gesê.Die meerderheid van die studente is in hul sesde en sewende jaar van studies.Die studente het benadruk daar is gereeld vertragings en probleme met die betaling van toelaes, wat tevore opskrifte in die media tot gehaal het. Nou word hulle weens onbetaalde huurgeld op die straat uitgeskop.Die ministerie van gesondheid en maatskaplike dienste het nie teen druktyd op ’n versoek om kommentaar gereageer nie. – republikein@republikein.com.na

Uitsetting dreig vir studente in Lusaka

Kommentaar

Republikein 2025-12-16

Meld asseblief aan om kommentaar te lewer

Uitsetting dreig vir studente in Lusaka

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.