Uitsaaikode kom binnekort

Augetto Graig - Die Regulerende Owerheid vir Kommunikasie van Namibië (Cran) het Maandag hul laaste openbare vergadering in voorbereiding op ’n nuwe uitsaaikode vir Namibië in die hoofstad gehou. Dié vergadering het belanghebbers bymekaargebring om die derde voorstel vir so ’n kode te bespreek.Cran se uitvoerende hoof, mnr. Festus Mbandeka, was positief oor die goeie bywoning van die geleentheid. Hy het hom oor die voortdurende goeie samewerking sedert die begin van die ontwerpproses vir die kode in 2015 uitgespreek. Mbandeka het gesê die kode moet onder meer plaaslike inhoud bevorder, openbare gesprek aanmoedig, deursigtigheid, vryheid van spraak en privaatheid verseker, kinders beskerm en haatspraak reguleer. Dit sal eers net op kommersiële en gemeenskapsuitsaaiers van toepassing wees, en die nasionale uitsaaier (NBC) sal later daaraan onderhewig wees ná die minister van inligting en kommunikasietegnologie ’n toepaslike datum daarvoor bepaal het. Mnr. Steven Ndorokaze, hoof van die staatsonderneming se regsdienste, het gesê verwarring oor die proses het tot die NBC se beperkte insette tot dusver oor die ontwikkeling van dié kode bygedra. Ten spyte hiervan het hy ander rolspelers in die plaaslike bedryf gelukgewens met dit wat tot dusver bereik is.Mnr. Robin Tyson, bekende televisiekenner en lektor by die Universiteit van Namibië (Unam), het gesê Cran het insette in ag geneem om ’n meer werkbare kode as voorheen saam te stel. Die nuutste voorlegging vir ’n kode het wyer konsultasie en internasionale beste praktyke ingesluit, het hy gesê.Mnr. Madryn Cosburn, van die televisiestasie One Africa, het gesê die nuutste kode is ’n prakties bruikbare dokument, wat kort voor lank in werking gestel kan word. Cosburn het wel gesê die vertraging in die implementering daarvan by die NBC sal die land swakker laat vaar wat mediavryheid betref.Slegs MultiChoice Namibia het 'n amptelike voorlegging by die geleentheid gemaak. Mnr. Roger Gertze, MultiChoice se hoofbestuurder, en me. Wendy Rosenberg, hul regsverteenwoordiger, het die maatskappy se unieke sakemodel verduidelik. Volgens hulle maak die maatskappy geen programme of musiekvideo’s nie.Hulle saai liewer volledige kanale, as deel van spesifieke pakkette, aan kliënte uit. Derhalwe het hulle geen beheer oor die inhoud van spesifieke programme of sekere kanale nie, het hulle gesê.Veral wat die skep van plaaslike inhoud betref, beperk Cran wat uitgesaai word en MultiChoice kan nie hiertoe bydra nie. Rosenberg het voorgestel Cran maak voorsiening vir ’n plaaslike kanaal en laat Multichoice só toe om tot plaaslike inhoud by te dra. Volgens die kode moet plaaslike radiostasies 15% plaaslike musiek uitsaai. Kommersiële televisie sal 10% plaaslike programme moet uitsaai, en gemeenskapstelevisiestasies 15%, terwyl diensverskaffers van betaal-TV sowat 1,5% van hul jaarlikse inkomste aan die aankoop en ontwikkeling van plaaslike inhoud moet bestee.MultiChoice, wat ’n betaal-TV-diensverskaffer is, het gevra Cran moet eerder tot 3% hiervoor oorweeg. Die kode beoog ook dat die NBC later tot 30% van musiek en programme aan plaaslike inhoud sal toeken. Dié kwotas sluit nie nuus, sport, geleenthede, promosies, advertensies en verkope in nie. Volgens Cran se regsverteenwoordiger, me. Emilia Nghikembua, sal alle insette gelewer in ag geneem word en so ver moontlik ingesluit word, en sal 'n byvoegsel dit verklaar. Dít sal dan aan Cran se raad oorhandig word, wat die volgende stappe na verwagting vroeg in Oktober sal doen, het Rosenberg gesê.

Uitsaaikode kom binnekort

Kommentaar

Republikein 2025-08-07

Meld asseblief aan om kommentaar te lewer

Uitsaaikode kom binnekort

Kommentaar

Republikein 2025-08-07

Meld asseblief aan om kommentaar te lewer

MELD AAN

Advertensie