‘Uiters gevaarlike’ orkaan op pad na Mexiko

’n Orkaan, wat deur weerkundiges as “uiters gevaarlik” beskryf word, stuur reguit op die Mexikaanse kus af.

Volgens CNN sal die orkaan, wat as Willa bekend staan, Mexiko se suidwestelike kusgebied teen gister tref. Die nasionale orkaansentrum waarsku dat die orkaan met huidige stormsterk winde van 256 km/h “katastrofies kan wees” en die potensiaal het om verwoesting te saai en duisende dakloos te laat.

Die storm kan yslike golwe en vloede veroorsaak en rampbestuurspanne is reeds op gereedheidsgrondslag geplaas om skade en lewensverlies so min as moontlik te hou.

Vroeër die maand het die orkaan Michael die Amerikaanse kusgebied getref en tot die dood van 27 mense gelei.

Reuters berig dat Willa as ’n kategorie-5 storm geklassifiseer en as “uiters gevaarlik” beskryf word. Die storm sal na verwagting die kusgebiede van Mazatlan, ’n gewilde vakansieplek, Jalisco, Nayarit en Sinaloa tref.

Bykans drie jaar gelede het die orkaan Patricia, een van die sterkste storms in dié gebied tot op hede, grootskaalse verwoesting aan die Mexikaanse kus gesaai. – Netwerk24