Tydens geboorte val baba op haar kop, sterf

Henriette Lamprecht – ’n Vrou wie se pasgebore dogtertjie dood is nadat sy tydens die bevalling op haar kop geval het, dagvaar die ministerie van gesondheid en maatskaplike dienste vir meer as ’n halfmiljoen Namibiese dollar.Me. Peelina Shiwovanhu Nghikumwa eis N$565 000 vir die dood van haar pasgebore dogtertjie Ashishe-Oshetu op 20 Oktober 2017 in die Engela-staatshospitaal.Volgens Nghikumwa het sy toe sy agt maande swanger “en in goeie gesondheid was”, in die woonkwartiere vir swanger vroue naby dié hospitaal gaan woon, omdat die nedersetting waar sy woon verafgeleë is. Tydens haar verblyf het sy drie voorgeboorte-ondersoeke gehad en is sy nooit ingelig dat enigiets met haar of haar ongebore baba fout was nie.Sy het op 20 Oktober gevoel “my tyd het gekom”, sê Nghikumwa. Sy is na die kraamafdeling waar ’n verpleegster haar ondersoek het en gesê het sy is naby aan kraam. Nghikumwa is na die voorbereidingskamer geneem waar sy sterk kontraksies ervaar het. Sy het omstreeks 13:00 na die verpleegster gestap wat haar vroeër gehelp het. Die verpleegster het haar na ’n kamer in die kraamsaal geneem en aan haar gesê om op haar sy op ’n bed te lê en ’n verpleegster te roep as die kontraksies vererger. Die verpleegster het haar om 15:00 weer ondersoek en weer om 18:00. Sy het Nghikumwa opdrag gegee om steeds op haar sy te bly lê en haar te roep as sy die baba voel.Nghikumwa sê omstreeks 19:00 het haar water gebreek en sy het die verpleegster geroep. Volgens haar het die betrokke verpleegster glo aan haar gesê “dit is nog nie tyd nie” en dat sy (Nghikumwa) net bang is om te kraam. Nghikumwa sê in haar verklaring water wat met bloed gemeng was, het uit haar gevloei.Sy is omtrent 21:40 deur nog ’n verpleegster opdrag gegee om op te staan en rond te loop om die kontraksies te versnel. Nghikumwa het glo aan haar gesê sy gaan enige oomblik geboorte skenk en haar bene lam was. Sy het weer op die bed gaan lê, maar is weer opdrag gegee om op te staan en rond te loop. Sy het op ’n bank naby die geboortekamer gaan sit en het volgens haar “erge kontraksies” ervaar. Nghikumwa sê in haar verklaring sy het ’n verpleegster gevra om haar te help, maar dié was glo op haar selfoon besig. Sy het stadig na die geboortekamer begin loop en weer vir hulp gevra.“Ek het tree vir tree probeer loop en net toe ek haar weer roep en voor ek weer by die bed kon kom, het die baba kop eerste op die vloer geval en die naelstring gebreek,” lui die verklaring.Volgens haar het ’n redelike tyd verloop voordat iemand haar te hulp gesnel het. Een van drie verpleegsters het die baba opgetel, terwyl nog een ’n skoonmaker gaan roep het om die bloed op te vee. Nghikumwa beweer ’n verpleegster het haar op die bed gehelp. Sy is later na ’n ander kamer geneem waar sy op ’n bed gaan lê het. ’n Verpleegster het vir haar gesê haar baba is dood. Die volgende oggend het die polisie ’n verklaring by haar afgeneem. Haar babadogtertjie is na Oshakati vir ’n lykskouing geneem. ’n Matrone en ’n dokter het later in die teenwoordigheid van die polisie gesê haar baba het tydens die val ’n kopbesering opgedoen wat haar dood veroorsaak het. – henriette@republikein.com.na

Tydens geboorte val baba op haar kop, sterf

Kommentaar

Republikein 2025-06-20

Meld asseblief aan om kommentaar te lewer

Tydens geboorte val baba op haar kop, sterf

Kommentaar

Republikein 2025-06-20

Meld asseblief aan om kommentaar te lewer

MELD AAN

Advertensie