Tyd vir bietjie graad vang

Dit is weer daai tyd van die jaar wat jy, elke keer as jy Facebook oopmaak, met een of ander gradeplegtigheidfoto gebombardeer word. Om graad te vang, is ’n wonderlike geleentheid. Dit voel vir die eerste keer of al die harde werk, bloed, sweet en trane die moeite werd is en jy kan uiteindelik op die verhoog klim en jou twee sekondes van fame geniet.Die idee van jou gradeplegtigheid is iets waaroor jy droom. Jy sien hoe jy reeds maande voor die tyd afsprake maak vir naels, hare en grimering. Jy sien hoe jy die winkels plat draf op soek na die een spesiale uitrusting wat jy dié dag kan aantrek. Jy kan alles doen om die dag perfek te maak, maar sekere elemente is net buite jou beheer. Met my gradeplegtigheid is daar sekere goed wat ek geleer het, wat ek hoop ander mense ook in gedagte sal hou: Jy kan nie die weer beheer nie. As dit gaan reën, gaan dit reën, en dit help nie jy vloek, gil of skree nie. Indien jy in Potchefstroom graad vang, het jy een van twee goed wat kan gebeur: Dit gaan óf honde en katte reën, of só warm wees dat jy jou ure se grimering teen jou wange voel afloop. Daar is nie tyd vir maande se voorbereiding nie. Jy dink daar is, en jy hoop daar sal wees, maar daar is nie. Jy kan ook verseker wees jy gaan een van die volgende verskynsels teëkom, want dit is ’n inherente deel van enige gradepletigheid: Mense wat hardloop. Daar is altyd iemand wat êrens heen hardloop, want iemand het verdwaal of verslaap of sommer al twee. En moenie dink hakskoene hinder iemand wat laat is vir die “groot dag” nie. O nee, dit is juis die dames met die hakskoene wat vir jou kan mielies gooi soos hulle beweeg. Dan is daar die desperate fotograwe wat alles in hul vermoë probeer doen om seker te maak hul kliënt kry die beste foto. Mense word gestamp en gestoot, gevegte breek uit om die perfekte plek op die gras te kry, mense loop voor fotograwe in, terwyl Johanna haar hoedjie vir die soveelste maal in die lug probeer gooi vir die perfekte aksiefoto, en ouers soek “net nog enetjie, asseblief”.Hopeloos te veel mense. Dit lyk kompleet of die ark oop is die dag wat jy graad vang, want die aantal mense op een plek is eintlik skokkend. Hoe meer mense daar is, hoe angstiger raak almal, want dit beteken alles vat langer. Dit is juis dan dat studente en hul ouers begin woorde wissel, want Johanna moet elfuur in die saal wees, maar Mamma en Pappa loop nie vinnig genoeg nie. Sodra jy in die saal is, word jy verduidelik waar jy moet kyk as jy op die verhoog klim, want daar is drie strategiese posisies waar kameras gevind kan word. Terwryl jy dit probeer onthou, moet jy daarop fokus om nie te val nie, want jy het gedink dit is ’n goeie idee om vyf meter hoë hakskoene aan te trek. Terwyl jy moet fokus op waar om te kyk en nie op jou agterstewe te beland voor ’n saal vol mense nie, moet jy ook onthou om te glimlag, want hierdie foto’s word aan elke familielid, vriend, kennis en buurman gestuur.Jou naam word gelees en jy moet jouself emosioneel voorberei op die wyse waarop jou naam uitgespreek gaan word, want as hulle sukkel met ’n naam soos Johan, wil jy nie eers weet wat hulle met ’n naam soos Mariselle gaan maak nie. Jy knip jou oë en daar is alles verby. Jy het jouself oor ’n mik gestres en jy en jou ma het elkeen ’n nuwe maagseer ryker geword, en in die proses het jy vergeet om dit net te geniet. Jy kan nie alles beheer nie, maar jy kan wel jou reaksies beheer, so drink ’n glasie sjampanje en just go with it.

Tyd vir bietjie graad vang

Kommentaar

Republikein 2025-06-26

Meld asseblief aan om kommentaar te lewer

Tyd vir bietjie graad vang

Kommentaar

Republikein 2025-06-26

Meld asseblief aan om kommentaar te lewer

MELD AAN

Advertensie